पणजी : विधानसभेचे अधिवेशन केवळ एका दिवसापुरते मर्यादित ठेवणे आणि महत्त्वाच्या विषयांवरील चर्चा कमी कालावधीसाठी मर्यादित करणे हा लोकशाहीला मोठा धोका असल्याचे मत विरोधी पक्षनेते युरी आलेमाव यांनी व्यक्त केले आहे.

सत्ताधारी पक्षाला जबाबदार धरण्यात आणि मतदारांचे प्रतिनिधित्व करण्यात विरोधक महत्त्वाची भूमिका बजावत असल्याने विधानसभेतील विरोधी सदस्यांच्या लोकशाही हक्कांचे रक्षण व्हावे, असे आवाहन काँग्रेसचे नेते युरी आलेमाव यांनी सभापती व कामकाज सल्लागार समितीचे अध्यक्ष रमेश तवडकर यांना लिहिलेल्या पत्रात केले आहे.

‘‘आमच्या हक्कांचे रक्षण करण्यासाठी कामकाज सल्लागार समितीने विरोधी पक्षाच्या आमदारांना सभागृहाच्या कामकाजात सहभागी होण्यासाठी पुरेसा वेळ दिला पाहिजे. तारांकित प्रश्न अतारांकित प्रश्नांमध्ये रूपांतर करण्याच्या प्रथेमुळे पारदर्शकता कमी होते आणि लोकशाही तत्त्वांचा ऱ्हास होतो. हे थांबवण्याची गरज असून लोकशाही प्रक्रियेशी खेळणाऱ्या संबंधित अधिकाऱ्यांना जबाबदार धरण्यात यावे,’’ असे आलेमाव यांनी पत्रात म्हटले आहे.

अधिवेशनाच्या ४८ तास अगोदर प्रश्नांची उत्तरे द्या

‘‘आमदारांनी उत्तरांचा अभ्यास करणे गरजेचे आहे, हे माहीत असूनही त्यांना जाणीवपूर्वक उशीर केला जातो. महत्त्वाच्या मुद्द्यांवर सरकारला जाब विचारण्यापासून रोखण्यासाठी हे केले जाते,' याकडे आलेमाव यांनी लक्ष वेधले.

“अधिवेशनात सर्व मंत्रालयांवर चर्चा व्हावी आणि जनतेचे व राज्याचे प्रश्न मांडता यावेत यासाठी कालावधी निश्चित करण्यात यावा. चालू वर्षात याचा गांभीर्याने विचार व्हावा, अशी अपेक्षा आहे, असेही पत्रात नमूद करण्यात आले आहे.