MLA Digambar Kamat: आपण मुख्यमंत्री असताना हाज यात्रेकरूंसाठी गोव्यातून थेट विमानसेवेची व्यवस्था केली होती. ही सेवा परत सुरू करण्यासाठी आपण मुख्यमंत्री डॉ. प्रमोद सावंत यांच्याशी चर्चा करू, असे आमदार दिगंबर कामत यांनी आज गोवा राज्य हाज समिती कचेरीच्या उद्‍घाटनप्रसंगी सांगितले.

मुख्यमंत्री डॉ. प्रमोद सावंत यांच्या हस्ते या कचेरीचे उद्‍घाटन करण्यात आले. गोवा राज्य हाज समितीचे अध्यक्ष उर्फान मुल्ला यांच्या वाढदिवसाचे औचित्य साधून माथानी साल्ढाना प्रशासकीय इमारतीच्या तळमजल्यावर ही कचेरी उघडण्यात आली आहे. त्यानंतर राज्यसभा खासदार व गोवा भाजपचे अध्यक्ष सदानंद शेट तानावडे यांनी भेट देऊन मुल्ला यांना वाढदिवसाच्या शुभेच्छा दिल्या.

गोव्यातील सर्व अल्पसंख्यांना सर्वतोपरी सहकार्य सरकारतर्फे देण्यात येईल, असे मुख्यमंत्री डॉ. प्रमोद सावंत यांनी सांगितले. दरम्यान, अध्यक्ष उर्फान मुल्ला यांनी गोव्यातील मुस्लिम बांधव सरकारसोबत आहेत. सरकार समाजापर्यंत पोहोचवीत आहे याची जाणीव सर्वांना असल्याचे सांगितले.