केपे: कुडचडे-काकोडा पालिकेच्या कचरा प्रक्रिया प्रकल्पाची चाचणी 10 मेपासून प्रायोगिक तत्त्वावर सुरू होणार आहे. सुमारे 100 टन क्षमता असलेल्या या प्रकल्पामुळे दक्षिण गोव्यातील चार तालुक्यांची कचरा समस्या सुटणार आहे.

या प्रकल्पात सुक्या व ओल्या कचऱ्यावर वेगवेगळी हाताळणी होणार आहे. दोन्ही ठिकाणी मिळून 100 टन कचऱ्याची रोज आवश्यकता भासणार असून, उद्या सकाळी प्रायोगिक तत्त्वावर प्रकल्पाची चाचणी होणार आहे.

30 मे रोजी या प्रकल्पाचे उद्‌घाटन करण्याची सरकारची योजना आहे. मात्र अद्याप काम पूर्ण झालेले नाही. तसेच प्रकल्पाच्या चाचणीनंतर तारीख ठरवणार असल्याचे सांगण्यात आले आहे. प्रकल्पाची उद्‌घाटनाची तारीख सध्या जाहीर झाल्याने प्रकल्पाचे उर्वरित काम युद्धपातळीवर सुरू आहे.

या प्रकल्पासाठी लागणारा 100 टन कचरा केपे, काणकोण, सांगे व धारबांदोडा तालुक्यातून पुरणार नसल्याने मुरगाव व मडगाव पालिकेचाही कचरा याठिकाणी आणावा लागणार आहे. अन्यथा हा प्रकल्प यशस्वी ठरणार नसल्याचे बोलले जात आहे.