मडगाव: दक्षिण गोव्यातील 21 मतदारसंघांमध्‍ये झालेले मतदान, ज्या यंत्रांत सीलबंद झाले आहे, ती यंत्रे मडगावच्या दामोदर महाविद्यालयात तयार करण्‍यात आलेल्‍या स्ट्राँग रूममध्ये कडेकोट बंदोबस्तात ठेवण्यात आली आहेत. येत्‍या 10 मार्च रोजी याच महाविद्यालयात दक्षिण गोव्‍यातील मतमोजणी होणार आहे.

पोलिसांकडून मिळालेल्या माहितीनुसार, मतदान यंत्रांच्या सुरक्षेसाठी केंद्रीय सुरक्षा दला, आयआरबी व गोवा पोलिस अशा तीन तुकड्या तैनात आहेत. शिवाय पूर्ण परिसर सीसीटीव्ही कॅमेऱ्यांच्या निगराणीखाली ठेवण्यात आला असून अनुचित प्रकार घडू नये यासाठी पुढील जवळपास महिनाभर दिवसाचे 24 तास डोळ्‍यांत तेल घालून या तुकड्या देखरेख ठेवणार आहेत. शिवाय अग्निशमन दलाचा बंबही तैनात करण्यात आला आहे.

दरम्‍यान, काल सकाळी 6 वाजता सुरू झालेली मतदान व त्यानंतरची प्रक्रिया काही ठिकाणी आज सकाळी 5 वाजता पूर्ण झाली अशी माहिती मिळाली आहे.