पणजी (Panaji) : गोवा विधानसभेचं पावसाळी अधिवेशन आजपासून सुरु झालं आहे. त्यातच गोव्यात सध्या राजकीय घडामोडींनाही वेग आला आहे. अधिवेशनासाठी विधानभवनात दाखल झालेल्या मंत्री विश्वजीत राणेंनी विविध मुद्द्यांवर भाष्य केलं आहे. यापुढेही अवैध बांधकामावर टीसीपीअंतर्गत कारवाई सुरुच राहणार, असल्याचं विश्वजीत राणेंनी स्पष्ट केलं आहे. त्यामुळे विश्वजीत राणे (Vishwajit Rane) आणि मायकल लोबो (Michael Lobo) यांच्यातला वाद काही शमणार नसल्याचीच चिन्ह दिसत आहेत. (Goa Congress News Today)

विश्वजीत राणे यांनी काँग्रेसमधील अंतर्गत कलहावरही टीका केली आहे. गोव्यात काँग्रेस अस्तित्वात नाही, असा टोला राणेंनी लगावला आहे. तसंच गोव्यात काँग्रेस पक्षाच्या तोडफोडीमधेये भाजपचा कोणताही सहभाग नसल्याचं विश्वजीत राणेंनी स्पष्ट केलं आहे. भाजपमध्ये कुणीही येऊ शकतात, असं म्हणत अप्रत्यक्षपणे त्यांनी काँग्रेसमधील आमदारांना पक्षात आमंत्रण दिल्याचंच चित्र आहे. (Goa Live Updates)

आपण काँग्रेसच्या तिकीटावर निवडून आलो असून अजूनही काँग्रेससोबतच असल्याचा दावा लोबो यांनी केला आहे. मात्र काँग्रेसकडून बैठकांवर बैठका घेतल्या जात असून आपल्याला पदावरुन दूर केल्याचंही मायकल लोबोंनी स्पष्ट केलं आहे. तसंच सरकारमधील मंत्र्यांकडून आपल्यावर गंभीर स्वरुपाचे आरोप केले जात असून आपल्यावर कारवाईही केली जात आहे. अशा परिस्थितीत आपण विरोधी पक्षनेतेपदी राहणं कठीण असल्याचं पक्षनेतृत्त्वाला कळवल्याचंही लोबोंनी स्पष्ट केलं आहे.

दरम्यान विरोधी पक्षनेते पदावरून मायकल लोबो यांची काँग्रेस पक्षाने हकालपट्टी केली आहे. त्यासंबंधीचे पत्र आता आपण सभापती रमेश तवडकर यांना सादर केले आहे. दुपारपर्यंत नवा विरोधी पक्षनेता निवडला जाईल आणि ती माहितीही सभापतींना सादर केली जाईल, असं स्पष्टीकरण काँग्रेस प्रदेशाध्यक्ष अमित पाटकर यांनी दिलं आहे. (Goa Latest News)