KTCL Buses Goa: राज्यातील मुख्य सार्वजनिक वाहतूक असलेल्या कदंब बसेसवर विमल पान मसाल्याच्या जाहिराती चिटकवण्यात आल्या आहेत. बसवरील जाहिराती काढाव्यात अशी मागणी वारंवार विद्यार्थी, पालक आणि डॉक्टरांनी निवेदन देऊन केली.

याची महामंडळाने आता गंभीर दखल घेत, सर्व बसवरील विमलच्या 'बोलो जुबां केसरी' जाहिराती काढून टाकाव्यात असा ठेका दिलेल्या कंत्राटदाराला आदेश दिला आहे.

कंत्रादाराने महिनाभरात जाहिराती काढून टाकल्या नाहीत तर महामंडळ स्वत: जबरदस्तीने या जाहिराती काढून टाकेल असाही इशारा महामंडळाने दिला आहे.

कंदबच्या 300 बसेसवर तीन वर्षांसाठी जाहिराती चिटकवण्याचे काम कंत्राटदाराला देण्यात आले. त्यापैकी 80 बसेसवर विमल पानमसाल्याची जाहिरात चिटकवण्यात आली. या सर्व जाहिराती हटवून त्याठिकाणी दुसरी जाहिरात लावण्यास कंत्राटदाराला सांगितले आहे. अशी कदंब महामंडळाचे सरव्यवस्थापक संजय घाटे यांनी एका मराठी दैनिकाला माहिती दिली आहे.

कदंबवर चिटकवण्यात आलेल्या विमल पान मसाल्याची जाहिरात तंबाखू विषयक असल्याने समाजात चुकीचा संदेश जात आहे. याबाबत विद्यार्थी, डॉक्टर, पालक आणि शिक्षक यांच्याकडून महामंडळाला वारंवार निवेदन देऊन जाहिराती हटविण्यास सांगितले.

कदंब महामंडळाने कंत्राटदाराला तीन वर्षांसाठी जाहिरात लावण्याचे कंत्राट दिले होते. त्याचे पैसे देखील महामंडळाने घेतले. दरम्यान, लावलेली जाहिरात तंबाखू विषयक असल्याने त्यावर आक्षेप घेण्यात आला. जाहिरातीला मोठ्या प्रमाणावर विरोध झाल्यानंतर अखेर कंदब महामंडळाने जाहिराती हटविण्याचे आदेश कंत्राटदाराला दिले आहेत.