Vijay Sardesai: फातोर्डा मतदारसंघात सर्वधर्मीय लोक एकत्रित राहतात. मारहाण करत कायदा हातात घेण्याचा कुणालाच अधिकार नाही. काहीजणांमुळे धार्मिक तेढ निर्माण होत असल्यास पोलिसांनी अशा घटकांवर कडक कारवाई करावी. अशा समाजकंटकांना राजकीय पाठिंबा मिळू नये, असे गोवा फॉरवर्डचे अध्यक्ष तथा आमदार विजय सरदेसाई यांनी सांगितले.

हिंदू स्मशानभूमीत कचरा टाकण्यावरून झालेल्या वादावर बोलताना सरदेसाई यांनी सांगितले की, हिंदू स्मशानभूमीत कचरा टाकल्याबाबत विचारणा केल्यानंतर हल्ला करण्याचा प्रकार चुकीचाच आहे. या घटनेचा निषेध नोंदवतो. कुणालाही कायदा हातात घेण्याचा अधिकार नाही. पोलिसांनी अशा घटकांवर निष्पक्षपणे कडक कारवाई करावी.

दरम्‍यान, भाजपचे माजी प्रवक्‍ते सावियाे रॉड्रिग्स यांनीही या घटनेचा निषेध केला. हिंदू स्‍मशानभूमीत कचरा आणून टाकण्‍याची घटनाच आक्षेपार्ह असून ही कृती धार्मिक तणाव निर्माण करण्‍यासाठी केली गेली होती का, याचा तपास करणे आवश्‍‍यक आहे. मुख्‍यमंत्री डॉ. प्रमोद सावंत यांनी या घटनेचा सखोल तपास करावा, अशी मागणीही त्‍यांनी केली.