मडगाव: कर्नाटक राज्याने म्हादई खोऱ्यात पाणी वळविण्यासाठी यंत्रसामग्री आणून ठेवली असून त्यांनी कामही सुरू केले आहे. अशा आशयाचे वृत्त वृत्तपत्रात प्रसिद्ध होऊनही गोवा सरकारने त्यावर अजून कोणतीही प्रतिक्रिया दिलेली नाही. यावर गोवा फॉरवर्डचे अध्यक्ष विजय सरदेसाई यांनी आश्चर्य व्यक्त केले आहे. मुख्यमंत्री प्रमोद सावंत यांनी आपल्या राजकीय स्वार्थासाठी म्हादई कर्नाटकला विकली का? असा सवाल त्यांनी यावेळी केला.

( Vijai Sardesai Allegations Chief Minister Pramod Sawant on Mahadayi River Case )

म्हादई गोव्याची जीवनदायिनी आहे. पण गोवा सरकारला त्याचे काहीच नाही. सावंत यांना म्हादई खरीच आपली आईं वाटत असेल तर त्यांनी पोलिसांना घेऊन संपूर्ण गोव्यात फिरण्याऐवजी जिथे काम चालू आहे तिथे स्वतः जाऊन पाहणी करून हे चालू झालेले काम बंद पाडावे अन्यथा आपण म्हादईचा कर्नाटकशी सौदा केला हे जाहीर करावे असे आव्हान त्यांनी केले आहे.

यापूर्वी म्हादई नदीत कर्नाटक बंधारा बांधून कर्नाटक पाणी वळवू पाहत आहे. याकडे पर्यावरण कार्यकर्ते राजेंद्र केरकर यांनी लक्ष वेधले होते. त्यावेळी मुख्यमंत्री सावंत यांनी आपण स्वतः परिस्थितीचा आढावा घेऊ असे म्हटले होते. पण मागच्या तीन महिन्यांत ते तिथे फिरकलेच नाहीत.

गोवा सरकारने कर्नाटक राज्याविरोधात सर्वोच्च न्यायालयात अवमान याचिका दाखल केली असे सांगण्यात येते आहे. ती याचिकाही अजून सुनावणीस येत नाही. गोवा सरकारला म्हादईचे काहीच पडलेले नाही असा अर्थ त्यातून काढायचा का? असा सवाल सरदेसाई यांनी केला आहे.