कळंगुट: सध्या बहुचर्चित असलेला चित्रपट म्हणजेच लक्ष्मण उतेकर दिग्दर्शित छावा. धर्मवीर छत्रपती संभाजी महाराज यांच्या जीवनावर आधारित या चित्रपटाची क्रेझ गोव्यात देखील पाहायला मिळतेय. छत्रपती संभाजी राजे म्हणजेच स्वराज्याचे धाकले धनी घराघरांमध्ये पोहोचावेत म्हणून विविध संघटनांकडून तरुणांना हा चित्रपट दाखवला जातोय. रविवारी (दि. १६ फेब्रुवारी) रोजी कळंगुट येथील श्री शांतादुर्गा-बाब्रेश्वर युवक संघाकडून तरुणांसाठी छावा या चित्रपटाच पाहण्याची सोय करण्यात आली होती.

कळंगुटचे पंच सदस्य प्रसाद शिरोडकर यांनी आयोजित केलेल्या या उपक्रमात जवळपास १५० पेक्षा अधिक प्रेक्षक उपस्थित होते. या संघटनेतील सुरज पिंगे यांनी दिलेल्या माहितीनुसार, तरुणांना छत्रपती संभाजी राजे आणि त्यांचे बलिदान याबद्दल माहिती मिळावी म्हणून हा उपक्रम राबवण्यात आला.

मुघली सत्ताधीश बादशाह औरंगझेब याने छत्रपती संभाजी महाराज यांना मरण यातना दिल्या, मात्र तरीही त्याच्यासमोर न झुकता केवळ धर्म आणि स्वराज अबाधित राहावं म्हणून महाराजांनी या यातना सहन केल्या आणि हाच भव्य इतिहास आजच्या पिढीला समजावा म्हणून त्यांच्याकडून हा उपक्रम करण्यात आला. महाराज्यांचं बलिदान मनामनामध्ये कायम राहावं म्हणून तरुणांना आणि लहानग्यांना चित्रपट दाखवण्यासाठी आणलं असं सुरज पिंगे म्हणालेत.

विकी कौशलची जादू!!

लक्ष्मण उतेकर यांच्या दिग्दर्शित चित्रपटात धर्मवीर संभाजी महाराज यांच्या भूमिकेत विकी कौशल आहे. विकीच्या अभिनयाचे सध्या सगळीकडे कौतुक केले जातेय. हिंदी अभिनेता असून देखील विकीचा मराठीचा अभ्यास या चित्रपटात वाखण्याजोगा असल्याचं प्रेक्षक म्हणतायत. याशिवाय चित्रपटात रश्मिका आणि अक्षय खन्ना हे देखील प्रमुख भूमिकेत आहेत.