Vedanta Mining Ore Transport Bicholim

डिचोली: खनिज वाहतुकीवरून निर्माण झालेला गुंता अखेर २२ दिवसानंतर सुटला असून, वेदांताची वाहतूक सुरु झाली आहे. ट्रकमालकांसह कामगारांनी डिचोलीचे उपजिल्हाधिकारी रोहन कासकर यांची शुक्रवारी भेट घेत, याप्रकरणी कायमाचा तोडगा काढण्याची विनंती केली होती.

खनिज वाहतुकीचा गुंता सुटता सुटत नसल्याने ट्रकमालकांसह 'वेदांता'च्या कामगारांची अस्वस्थता वाढली होती. खनिज वाहतूकप्रश्नी कायमचा उपाय काढा आणि आम्हाला संकटातून बाहेर काढा, अशी मागणी ट्रकमालकांसह कामगारांनी उपजिल्हाधिकाऱ्यांकडे केली.

कामगार आणि ट्रकमालकांनी उपजिल्हाधिकाऱ्यांसमोर आपली कैफियत मांडून त्यांना मागणीचे निवेदन दिले.

डिचोली ट्रकमालक संघटनेचे अध्यक्ष राजाराम (सतीश) गावकर आणि कामगार युनियनचे सरचिटणीस आत्माराम तिळवे यांच्या नेतृत्वाखाली कामगार आणि ट्रकमालकांनी उपजिल्हाधिकारी कासकर यांची भेट घेतली.

खनिज वाहतूकप्रश्नी तोडगा काढण्यासाठी सर्व संबंधित यंत्रणांचे प्रयत्न सुरू आहेत, असे उपजिल्हाधिकाऱ्यांनी सांगून याप्रश्नी सर्वमान्य तोडगा निघण्याची शक्यता वर्तवली होती. अखेर २२ दिवसानतंर या समस्येवर तोडगा निघाला आहे.

ट्रकांची ये-जा सुरु

डिचोलीतील खनिज वाहतुकीचा गुंता अखेर सुटल्यातच जमा आहे. आज सायंकाळपासून खनिज वाहतूक सुरू झाली असून तब्बल २२ दिवसांच्या प्रतीक्षेनंतर डिचोलीत खनिज वाहतूक करणाऱ्या ट्रकांची धडधड सुरू झाली आहे. खनिज वाहतुकीसाठी सार्वजनिक रस्ता वापरण्यास मान्यता मिळाल्याने 'वेदांता'च्या खनिज वाहतुकीचा मार्ग मोकळा झाला आहे. पिळगाव जंक्शनवरून सार्वजनिक रस्त्याने ही खनिज वाहतूक सुरू झाली आहे.