Bicholim Mining Issue: आंदोलन मिटेना! ‘वेदांता’ कंपनीचा प्रस्ताव अमान्य; 'खनिज वाहतूक'प्रश्नाचे घोंगडे भिजत

Vedanta mining dispute pilgao farmers protest bicholim

डिचोली: खनिज वाहतूक कधी सुरू होणार याची खाणीवरील कामगारांसह ट्रकमालकांना प्रतीक्षा लागून राहिली असली, तरी आंदोलन अजूनही मिटत नाही. ‘वेदांता’ कंपनीचा प्रस्ताव कामगारांना मान्य नाही. त्यामुळेच डिचोलीतील आंदोलनप्रश्नी ‘सुवर्णमध्य’ निघत नाही अशी विश्वसनीय माहिती मिळाली आहे.

आमची शेती आम्हाला द्या. तसेच कपात केलेल्या कामगारांना सेवेत घ्या, अशी मागणी पुढे करून शेतकऱ्यांसह कामगारांनी ‘वेदांता’च्या खाणीवरील रस्ता अडवला आहे. परिणामी गेल्या सतरा दिवसांपासून खाणीवरील खनिज वाहतूक ठप्प झाली आहे. याप्रश्नी गेल्या आठवड्यात शेतकऱ्यांनी डिचोलीचे आमदार डॉ. चंद्रकांत शेट्ये आणि मयेचे आमदार प्रेमेंद्र शेट यांची भेट घेवून त्यांच्यासमोर आपली कैफियत मांडली होती.

मिळालेल्या माहितीनुसार, आमदारांनी दिलेला कंपनीचा प्रस्तावही शेतकरी आणि कामगारांना मान्य नाही. रस्त्यासाठी जमीन गेलेल्या शेतकऱ्यांना नुकसान भरपाई आणि कपात केलेल्या कामगारांना १५ दिवसांचा अतिरिक्त कपात लाभ देण्यास कंपनी तयार आहे. मात्र, या प्रस्तावाबाबतीत कामगार आणि शेतकरी समाधानी नसल्याचे समजते. आंदोलन प्रश्नी तोडगा काढण्यासाठी आठवड्यापूर्वी प्रशासकीय पातळीवरील एक संयुक्त बैठक झाली होती. त्या बैठकीतही कंपनीचा प्रस्ताव शेतकऱ्यांना मान्य झाला नव्हता.