Vedanta proposal for public road usage in pilgao

डिचोली: डिचोलीतील खनिज वाहतुकीसाठी सार्वजनिक रस्ता वापरण्यास सरकारने मान्यता दिली असून, वेदांताच्या खनिज वाहतुकीचा मार्ग मोकळा झाला आहे, अशी माहिती समोर आली आहे. सरकारने परवानगी दिलेल्या सार्वजनिक रस्त्याने खनिज वाहतूक करण्याची ‘वेदांता’ने तयारीही सुरू केली असून, उद्यापासून खनिज वाहतूक करणारे ट्रक रस्त्यावर उतरणार असल्याची माहिती मिळाली आहे.

चौदा तासांत ६२० ट्रिप

खाणीवरील रस्ता अडवल्याने पिळगाव जंक्शन ते सारमानस या सार्वजनिक रस्त्याने खनिज वाहतुकीस परवानगी द्यावी. असा प्रस्ताव ‘वेदांता’ कंपनीने सरकारला दिला आहे. या प्रस्तावाला सरकारने मान्यता देताना ८०० मीटर सार्वजनिक रस्ता वापरण्याची मुभा दिल्याची माहिती मिळाली आहे. सार्वजनिक रस्त्यावरील वाहतूक कोंडी टाळण्यासाठी प्रस्तावित रस्त्याने रात्रीच्यावेळीही खनिज वाहतूक करण्याची सूचना करण्यात आल्याची माहिती आहे.

त्यानुसार विश्रांतीची वेळ सोडून सकाळी ९ ते सायंकाळी ५ वाजेपर्यंत आणि रात्री ११.३० ते पहाटे ५.३० वाजेपर्यंत खनिज वाहतुकीचा पर्याय खाण खात्याने ‘वेदांता’समोर ठेवला आहे. दिवसा दर ताशी ४० आणि रात्री दर ताशी ५० ट्रिप खनिज वाहतूक करण्याचा प्रस्ताव आहे, अशी माहिती मिळाली आहे. नव्या प्रस्तावानुसार सकाळी ९ ते दुसऱ्या दिवशी पहाटे ५.३० वाजेपर्यंत मिळून १४ तासांत तब्बल ६२० ट्रिप खनिज वाहतूक होऊ शकते.