Vathadev Road :

डिचोली, वाठादेव - सर्वण भागात मुख्य रस्त्यावर पुन्हा एकदा विक्रेत्यांचे आक्रमण वाढत असल्याचे चित्र दिसून येत आहे. राज्य महामार्गाअंतर्गत रुंदीकरण केलेल्या झांट्ये महाविद्यालय परिसरातील रस्त्यावर सध्या फळभाजी विक्रेत्यांनी अतिक्रमण केले आहे.

गेल्यावर्षी या रस्त्यावर मासळी विक्रेत्यांचे अतिक्रमण वाढले होते. मात्र, कारापूरचे तत्कालीन सरपंच दत्तप्रसाद खारकांडे यांनी कडक भूमिका घेतल्यानंतर मासळी विक्रेत्यांना तेथून गाशा गुंडाळावा लागला होता.

त्यानंतर गेल्या तीन-चार महिन्यांपासून वाठादेव परिसरात रस्त्यावर बसण्याचे धाडस विक्रेत्यांनी केले नव्हते. मात्र, आता फळभाजी विक्रेत्यांनी आपला मोर्चा या रस्त्यावर वळवला आहे. वाहतूक सुरक्षित व्हावी आणि रस्त्यावरील अपघात टाळावेत. या उद्देशाने वाठादेव येथे रस्त्याचे रुंदीकरण केले असले, तरी विक्रेत्यांचे अतिक्रमण पाहता रस्ता रुंदीकरण नेमके कोणासाठी? असा प्रश्न वाहनचालक उपस्थित करीत आहेत.

अपघाताची भीती

रुंदीकरण केलेल्या रस्त्यावरच फळभाजी विक्रेते बसतात व रस्त्यावरून ये-जा करणारे ग्राहकही रस्त्यावरच वाहने उभी करून फळभाजी खरेदी करतात. यामुळे एखादेवेळी अपघात होण्याची शक्यता नाकारता येत नाही.

तशी भीतीही वाहनचालक आणि नागरिक व्यक्त करीत आहेत. आधीच दिवसेंदिवस रस्ता अपघात वाढत आहेत. एखादी वाईट घटना घडण्याआधीच स्थानिक पंचायत किंवा संबंधित सरकारी यंत्रणेने या विक्रेत्यांविरोधात वेळीच कारवाई करावी, अशी मागणी शैलेश फातर्पेकर आणि अन्य वाहनचालक करीत आहेत.