अमर नाईक हत्येप्रकरणी वास्को पोलिसांनी कथित आरोपी रियाझ शेखला आज (28 ऑक्टोबर) अटक केली. तब्बल तीन वर्षांनंतर रियाझला अटक करण्यात आली. दुबईवरुन परत येताच मोपा विमानतळावर रियाझला पकडण्यात आले. वास्को पोलिसांनी ही कारवाई केली. अमर नाईक यांच्या हत्येत आरोपी रियाझचा हात होता.

याआगोदर दोघांना अटक!

दरम्यान, बोगमाळो रंगवी इस्टेट येथे 15 जुलै 2021 रोजी अमर नाईक यांची गोळ्या झाडून हत्या करण्यात आली होती. अमर नाईक यांच्या हत्येप्रकरणी याआगोदर शैलेश गुप्ता(29) व शिवम सिंग(22) (उत्तर प्रदेश) या संशयितांना अटक करण्यात आली होती. मोठ्या शोध मोहिमेनंतर पोलिसांनी या दोन्ही आरोपींना (Accused) कासावली येथून ताब्यात घेतले होते. चौकशीदरम्यान पैसे घेऊन हा खून केल्याचे त्यांनी कबुलही केले होते. पोलिसांनी ताब्यात घेतलेले दोन्ही संशयित हे मूळ उत्तरप्रदेशमधील असल्याची माहिती पोलिस अधीक्षक पंकजकुमार सिंग यांनी दिली होती.

हत्येचं कारण काय?

प्रॉपर्टी डीलिंग करण्याचा बहाणा करुन बोलावून बोगमाळो रंघवी इस्टेटमध्ये नवेवाडे वास्को येथील काल अमर नाईक यांच्या डोक्यात गोळी झाडून हत्या करण्यात आली होती. गोळीबारात जखमी झालेल्या अमर नाईक यांना उपचारासाठी चिखली येथील रुग्णालयात (Hospital) नेत असतांनाच मृत घोषित करण्यात आले होते. अमर नाईक यांचा 22 जुलै रोजी वाढदिवस होता यापूर्वीच काळाने त्यांच्यावर घाला घातला असल्याचे सांगून त्यांच्या बहिणीने हंबरडा फोडला होता.