Goa Crime: नातेवाईक महिलेसोबत भांडण अन्... तरुणाने स्वतःच्या पोटात चाकू खुपसून संपवलं आयुष्य, पोलिस तपास सुरू

शिवोली: राय-शिवोली येथे संजय गोवेकर यांच्या घरात भाडेकरू म्हणून राहणाऱ्या रोहित जळगांवकर (वय २६, रा. पुणे, महाराष्ट्र) या तरुणाने शुक्रवारी सकाळी स्वतःच्या पोटात चाकू भोसकून घेत आत्महत्या केली.

या घटनेमागील नेमके कारण अद्याप स्पष्ट झाले नसले, तरी घरगुती वादातून ही घटना घडल्याची प्राथमिक माहिती पोलिसांकडून मिळाली आहे. रोहित हा आपल्या जवळच्या महिला नातेवाईकासोबत राहत होता. घरात वाद झाल्यानंतर त्याने स्वतःच्या पोटात चाकू भोसकून घेतला. गंभीर दुखापत होऊन मोठ्या प्रमाणात रक्तस्त्राव झाल्याने त्याचा मृत्यू झाल्याचे पोलिसांनी सांगितले.

घटनेची माहिती मिळताच शिवोली आऊटपोस्टचे हवालदार रुपेश शेटगावकर यांनी तातडीने घटनास्थळी धाव घेत पंचनामा केला. मृतदेह शवविच्छेदनासाठी बांबोळी येथील गोवा वैद्यकीय महाविद्यालयाच्या इस्पितळात पाठविण्यात आला आहे. याप्रकरणी हणजूण पोलिस ठाण्याचे उपनिरीक्षक किनळेकर अधिक तपास करीत आहेत.