Goa Crime : वास्को शहरात मंगळवारी सायंकाळी लहान मुलाचे अपहरण करीत असल्याचा आरोप करत लोकांनी एकाला जबर चोप दिला होता. याप्रकरणी पोलिसांनी आता तीन आरोपींना अटक केली आहे. मारहाणीचा व्हिडीओ सोशल मीडियावर चांगलाच व्हायरल होत आहे. याच व्हिडीओच्या आधारे पोलिसांनी आरोपींची ओळख पटवून तिघांवर गुन्हा दाखल केला आहे.

वास्कोत मनोरुग्णाला मंगळवारी मुलं पळवत असल्याचा आरोप करत एका व्यक्तीला जमावाने बेदम मारहाण करण्यात आली होती. वेळीच घटनास्थळी पोहोचलेल्या पोलिसांनी त्याला जमावाच्या तावडीतून सोडविले. अखेर मारहाण करण्यात आलेला इसम मनोरुग्ण असल्याची माहिती वास्को पोलिसांनी दिली.

सध्या गोव्यासह इतर राज्यांतही लहान मुलांचे अपहरण करणारी टोळी फिरत असल्याची माहिती पोलिसांमार्फत सोशल मीडियावर फिरत आहे. सर्व पालकांनी आपल्या मुलांना सांभाळावे, अशा संदेश पोलिसांनी यानिमित्ताने दिला आहे.

मंगळवारी सायंकाळी 5 वाजता वास्कोतील टी. बी. कुन्हा मासळी मार्केटच्या बाजूला एक इसम लहान मुलाचे अपहरण करीत असल्याची आरडाओरड सुरू होताच जमावाने त्या इसमाला चोपायला सुरुवात केली. मुलांचे अपहरण करीत असल्याचा आरोप करत लोकांनी त्या इसमाला दंडुके, लाथा-बुक्क्यांनी बेदम मारहाण केली. अखेर पोलिसांचे गस्त घालणारे वाहन तेथे आल्यामुळे तो बचावला.

संशयित व्यक्तीची चौकशी केल्यावर त्याने त्याचे नाव धेन जोन्स, वय 52 वर्षे पाँडिचेरी असे सांगितले. चौकशीत तो समाधानकारक उत्तरे देत नव्हता आणि तो मानसिकदृष्ट्या अस्थिर दिसत होता, त्यामुळे त्याची योग्य काळजी घेण्यासाठी त्याच्याकडे कोणीही नव्हते. भविष्यात कोणतीही अप्रिय घटना टाळण्यासाठी संशयित व्यक्तीला मानसिकदृष्ट्या अस्थिर आहे की नाही हे तपासण्यासाठी एसडीएच चिखली येथे वैद्यकीय तपासणीसाठी पाठवण्यात आले.