वाळपई: सत्तरी तालुक्यातील बहुतेक सर्वच सार्वजनिक  रस्त्यांवर  मोठ्या प्रमाणात आढळणारी  मोकाट  गुरे  अपघातांना कारणीभूत ठरू लागली आहेत. लोकांच्या जीवाला धोकादायक ठरणाऱ्या या गुरांचा संबंधित प्रशासनाने बंदोबस्त करावा, अशी मागणी स्थानिक रहिवासी आणि प्रवाशांकडून करण्यात येत आहे.

आता पावसाळा सुरू झाल्यानंतर मोकाट गुरांच्या संख्येत वाढ झाली असून सर्वच भागांत रस्त्याच्या मधोमध ठाण मांडून ती बसलेली आढळतात. त्यामुळे वाहनचालकांना विशेषत: रात्री जीव मुठीत  धरून वाहन हाकावे लागते. रात्रीच्या वेळी ही गुरे रस्त्यावर कळपाने बसलेली असतात. सध्या पावसाचे दिवस असल्याने रस्त्यावर बसलेल्या गुरांचा अंदाज येत नाही. ग्रामीण भागांतील रस्त्यांवर मुळात दिव्यांचा अभाव असतो. अशावेळी ही गुरे अपघातास कारणीभूत ठरतात.

 वाळपई शहरात तर रात्रीच्या वेळी गुरेच गुरे दिसू लागली आहे. वाळपई-ठाणे मार्गावर अनेक ठिकाणी कळपाने रस्त्याच्या मधोमध गुरे बसलेली दिसतात. शहरांसह ग्रामीण भागातही हीच स्थिती आहे. काल ठाणे येथे पिंपळाच्या झाडाखाली पार्क करून ठेवलेल्या दुचाकी गुरांनी पाडून तिचे नुकसान केले. तसेच रस्त्यावर पडलेल्या शेणावरून घसरून तिघेजण पडल्याची घटना घडली.  याबाबत स्थानिक पंचायत किंवा नगरपालिकांनी अशा गुरांवर कारवाई करण्याची गरज आहे. मालकांनी आपली गुरे स्वत: सांभाळावीत किंवा संबंधितांनी  रस्त्यावर फिरणारी गुरे गोशाळेत पाठवावीत.

मालक असूनही जनावरे बेवारस

रस्त्यावर बसणाऱ्या अनेक गुरांच्या कानाला बिल्ला असल्याने या गुरांचा मालक कोण हे समजते. मात्र, मालक असूनसुद्धा ती मोकाट व बेवारसपणे फिरत असतात. त्यांच्या रोजच्या कटकटीमुळे स्थानिक नागरिक हैराण झाले आहे.    अनेक वेळा ही गुरे रस्त्याच्या बाजूला उभी केलेली वाहने विशेषत: मोटारसायकल, स्कूटर पाडून त्यांचे नुकसान करतात.

वाहतूक कोंडी; अपघातांना आमंत्रण

ही गुरे रस्त्यावरच ठाण मांडून बसत असल्याने सर्व गुरांचे शेण रस्त्यावर पसरते. पावसाच्या पाण्याने ते वाहून सर्वत्र पसरते. त्याचबरोबर शेणामुळे रस्ते सुळसुळीत होऊन वाहनचालक घसरून पडतात. अनेक वेळा या गुरांमुळे रस्त्यावर वाहतूक कोंडीही होते. बऱ्याचवेळा हॉर्न वाजवूनही ही गुरे रस्त्यावरून हलत नाहीत. चालक वा क्लिनरला गाडीतून उतरून गुरांना हाकलावे लागते.