वाळपई: गोव्यात वेगवेगळ्या ठिकाणी गोमांसाच्या तस्करीवर कारवाई होत आहे. अशातच वाळपई पोलिसांनी देखील धडक कारवाई करत केरी तपासणी नाक्यावर मोठ्या प्रमाणात बेकायदेशीर गोमांस जप्त केले आहे. वाळपई पोलिसांच्या या कारवाईचे सगळीकडून कौतुक होत आहे.

गुरुवारी (दि.१५) रात्री १.३० च्या सुमारास केरी तपासणी नाक्यावर केए ४८ एम १११७ या सफेद रंगाच्या वाहनाची चोकशी केली असता गाडीत मोठ्या प्रमाणात गोमांस सापडले. यासोबतच गाडी चालकांजवळ कोणत्याही प्रकारचे कायदेशीर कागदपत्र आढळले नाहीत, त्यामुळे वाहतूक केली जात असलेले गोमांस बेकायदेशीर असल्याची पोलिसांना खात्री पटली.

५०० किलोहून अधिक गोमांस जप्त

ही बेकायदेशीर वाहतूक बेळगावहून मडगाव येथे केली जात होती. वाळपई पोलिसांनी धडक कारवाई करत वाहन ताब्यात घेतले असून बेकायदेशीर गोमांस वाहतूक करत असल्याप्रकरणी दोघांविरुद्ध गुन्हा नोंद करत वसीम आदमसाब होंगल व सुहैल अहमद एस अत्तर (रा. कर्नाटक) यांना अटक करण्यात आली आहे.

या धडक कारवाईत मोठ्या प्रमाणात बेकायदेशीर गोमांस जप्त करण्यात आलेय. ५०० किलोहून अधिक जप्त केलेल्या या गोमांसाची किंमत एक ते दीड लाख रुपये आहे.

दरम्यान, पशुवैद्यकीय डॉक्टरांनी पंचनामा करत गोमासाची तपासणी केली आहे व अहवाल पोलिसांना सादर केला आहे. या प्रकरणाचा तपास वाळपई पोलिस निरीक्षक विदेश शिरोडकर यांच्या मार्गदर्शनाखाली उपनिरीक्षक खुशाली नाईक करत आहेत.

वाळपईत 750 किलो बेकायदा गोमांस जप्त

यापूर्वी देखील वाळपई पोलिसांनी पशुवैद्यकीय अधिकाऱ्यांच्या मदतीने धडक कारवाई करत ७५० किलो बेकायदा गोमांस जप्त केले होते. त्या जप्त केलेल्या गोमांसाची एकूण किंमत सुमारे ३ लाख रुपये असून पोलिसांनी दोघा संशयितांना अटक केली होती.