Valpoi News : येथील सरकारी उच्च माध्यमिक विद्यालयाच्या धोकादायक इमारतीच्या दुरुस्तीचे काम अखेर पूर्ण झाले आहे. त्यामुळे पाच जूनपासून सुरू होणाऱ्या नव्या शैक्षणिक वर्षात विद्यार्थ्यांना नवी झळाळी प्राप्त झालेली इमारत मिळणार आहे. त्यामुळे पालक व विद्यार्थ्यांनी समाधान व्यक्त केले आहे.

इमारतीच्या दुरुस्तीसाठी 66 लाख रुपये खर्च झाले. स्थानिक आमदार तथा आरोग्यमंत्री विश्वजीत राणे यांच्या प्रयत्नाने हा प्रस्ताव पूर्ण होऊ शकला. या विद्यालयात सुमारे 550 विद्यार्थी शिकतात. यात कला, वाणिज्य, विज्ञान, हाॅर्टीकल्चरसह इयत्ता अकरावी व बारावीचे वर्ग आहेत.

वर्षभरापासून रखडला होता प्रस्ताव

25 वर्षांपासून या इमारतीची दुरुस्ती केलेली नव्हती. धोकादायक इमारतीमुळे अपघाताची शक्यता होती. एक वर्षापासून दुरुस्तीच्या प्रस्तावाला मंजुरी मिळालेली नव्हती. काही महिन्यांपूर्वी वर्ग सुरू असतानाच दोन विद्यार्थ्यांवर छप्पराच्या सिमेंटचा तुकडा पडला. त्यावेळी दै. ‘गोमन्तक’ वृत्त प्रसिद्ध केल्याने विधानसभेत हा प्रश्न गाजला. यासंदर्भात वेळोवेळी वर्तमानपत्रांतून आवाज उठविल्यानंतर साबांखाने इमारतीची तात्पुरती दुरुस्ती केली होती. अखेर कायमस्वरूपी दुरुस्तीच्या प्रस्तावाला मंजुरी मिळवून हे काम पूर्ण केले.

ही इमारत जुनी झाल्याने पावसाळ्यात छप्परामधून पाणी वर्गात शिरत होते. यामुळे मुलांना अनेकदा विजेचा शॉक लागला होता. त्यामुळे वर्गात मुले जीव मुठीत घेऊन शिक्षण घेत होती. पालकांनी वेळोवेळी सरकारकडे इमारत दुरुस्तीची मागणी केली होती. त्यामुळे मंत्री राणे यांच्या प्रयत्नाने अखेर या दुरुस्तीच्या प्रस्तावाला मंजुरी मिळाली आणि कामही पूर्ण झाले.

- प्राचार्य रियाज जमादार.