Valpoi Garbage Problem: वाळपई ठाणे मार्गावरील कोपार्डे येथे रस्त्याच्या बाजूला मोठ्या प्रमाणात अज्ञातांकडून वारंवारपणे कचरा फेकला जात आहे. तसेच या कचऱ्यामुळे परिसरात दुर्गंधी पसरलेली आहे. त्यामुळे तिथून जाताना नागरिकांना नाक बंद करून जावे लागत आहे.

सदर रस्ता हा वाहतुकीसाठी मुख्य रस्ता असून हा सर्व प्रकार रात्रीच्या वेळी घडत असल्याचा अंदाज आहे. वारंवार कचरा फेकला जात असल्याने सदर परिसरात कचऱ्याचा ढीग झाला आहे. रस्त्याच्या खाली खोल दरी असून बाजूला नदी आहे.

आता एकदा दर पाऊस सुरु झाला तर हा कचरा पाण्याच्या प्रवाहाने वाहून नदीत मिसळण्याची भीती निर्माण झाली आहे.

त्यामुळे म्हाऊस पंचायतीने या प्रकरणी लवकरात लवकर उपाययोजना करण्याची गरज असून दोषींवर कारवाई करण्याची मागणी स्थानिकांनी केली आहे.