गोव्यातील सार्वजनिक वाहतूक आणि त्यामुळे राज्यात येणाऱ्या पर्यटकांसाठी निर्माण होणाऱ्या समस्या हा नवा विषय नाही. राज्यातील टॅक्सीवाले अधिक पैसे घेतात असा वारंवार आरोप केला जातो. येथील टॅक्सी धारकांच्या वर्चस्वामुळे येथे आजवर ओला, उबर यासारख्या खासगी कॅब सेवा पुरवणाऱ्या सुविधा सुरू झाल्या नाहीत.

दरम्यान, वागातोर ते मोपा विमानतळ असा टॅक्सी प्रवास करणाऱ्या एका पर्यटकाने या प्रवासासाठी 1,200 रूपये मोजले. त्यानंतर तो चांगलाच संतापला आहे.

झाले असे की शिवम वाहिया या व्यक्तीने वागातोर ते मोपा विमानतळ प्रवास करण्यासाठी 1,200 रूपये टॅक्सी भाडे मोजले. त्यानंतर शिवमने संताप व्यक्त करत राज्यातील या व्यवस्थेवर ताशेरे ओढले आहेत.

'राज्यात उबर आणि ओला सुरू न करणे हे मार्केटच्या विरोधात आहे. तो दिवस दूर नाही जेव्हा गोव्यात येण्यासाठी प्रवेश फि द्यावी, तो एक प्रकारचा क्वासी व्हिसा आहे. गोव्यातील पोलीस हा विस्कळीतपणा संभाळू शकत नाहीत, सुधारणा करण्यासाठी दिल्लीने मदत पाठवायला हवी.' असे ट्विट शिवम यांनी केले आहे.

या ट्विटवर अनेक प्रतिक्रिया आल्या आहेत. एका युझरने गोव्यातील टॅक्सी भाडे धक्कादायक असल्याचे मत व्यक्त केले आहे. तसेच, दुसऱ्या एका युझरने गोवा पेक्षा सिंगापूर परवडले असे खोचक ट्विट केले आहे.

तसेच, आणखी एकाने त्याला गोवा माईल्स बुक करण्याचा सल्ला दिला, त्यावर शिवम यांनी गोवा माईल्स बुक होत नसल्याचे सांगितले. आणखी एकाने त्याला दुजोरा देत गोवा माईल्सची सुविधा काही भागात सेवा देत नाही अशी तक्रार केली आहे.

दरम्यान, यापूर्वी देखील मोपा विमानतळ येथे जाण्यासाठी खासगी टॅक्सीवाले अधिक भाडे घेत असल्याची तक्रार केली आहे. सरकारकडून मोपावर ब्ल्यु टॅक्सी सुरू करण्याचे प्रयत्न सुरू असन, याबाबत प्रक्रिया सुरू आहे.