पणजी: काँग्रेसचे प्रदेशाध्यक्ष गिरीश चोडणकर यांच्या ‘एक्स’ खात्यावरील एका पोस्टने थेट उत्तराखंड पोलिसांचे लक्ष वेधून घेतले आहे. या पोस्टने भारतीय कायद्याचे उल्लंघन केल्याचा दावा करत ती हटविण्याची मागणी उत्तराखंड पोलिसांनी ‘एक्स’कडे केली आहे.

त्यामुळे गोव्यातील राजकीय आरोप-प्रत्यारोप आता थेट राज्याच्या सीमा ओलांडून पोलिसांच्या दारात पोहोचल्याचे चित्र निर्माण झाले आहे. चोडणकर यांनी ‘राष्ट्रीय सकल विकासदराची खरी गोष्ट’ नावाचा एक व्हिडिओ ‘एक्स’वर पोस्ट केला आहे. प्रत्यक्षातील विकासदर कमी असताना सरकारने तो जास्त दाखवल्याची चर्चा त्या व्हिडिओत करण्यात आली आहे. त्यावरून ही कारवाई सुरू झाली आहे.

या संदर्भात ‘एक्स’ने चोडणकरांना पाठविलेल्या पत्रात उत्तराखंड पोलिसांकडून त्यांच्या खात्याविरोधात विनंती प्राप्त झाल्याचे स्पष्ट केले आहे. संबंधित सामग्री कायद्याचे उल्लंघन करणारी असल्याचा दावा पोलिसांनी केल्याचेही ‘एक्स’ने नमूद केले आहे. विशेष म्हणजे, ‘एक्स’ने ही माहिती वापरकर्त्याला देत त्याला कायदेशीर सल्ला घेण्यापासून न्यायालयात आव्हान देण्यापर्यंतचे पर्याय खुले असल्याचे सांगितले आहे.

राजकीय वर्तुळात खळबळ

काँग्रेसकडून सरकारविरोधात सातत्याने सोशल माध्यमांवरून टीकेची धार वाढविली जात असताना, आता चोडणकरांच्या एका पोस्टवरच परराज्यातील पोलिसांनी आक्षेप घेतल्याने राजकीय वर्तुळात खळबळ उडाली आहे.

पोस्ट नेमकी कोणत्या मुद्द्यावरून आक्षेपार्ह ठरली, त्यात कोणत्या कायद्याचे उल्लंघन झाल्याचा दावा आहे आणि उत्तराखंड पोलिसांनी कोणत्या आधारावर ही मागणी केली, हे अद्याप स्पष्ट झालेले नाही.