Goa Fraud Case: उत्तर प्रदेशातील मथुरा येथील एका कंपनीने गोव्यातील तब्बल 1000 लोकांची फसवणूक केली आहे. या 1000 गुंतवणूकदारांकडून जादा व्याजाच्या आमिषाने पैसे गोळा केले गेले, पण गेल्या 3 वर्षांत या गुंतवणूकदारांना परतावाच देण्यात आलेला नाही.

या फसवणुकीतील रक्कम जवळपास 10 कोटी असल्याचे समोर आले आहे. या प्रकरणी उत्तर प्रदेशातील संबंधित कंपनीविरोधात गोव्यात गुन्हा दाखल करण्यात आला आहे.

या कंपनीने सुमारे 1000 गुंतवणूकदारांची 10 कोटी रुपयांची फसवणूक केल्याचा आरोप आहे. गुंतवणुकदारांच्या तक्रारीवरून पोलिसांनी कंपनीचा अध्यक्ष आणि त्याच्या इतर दोन साथीदारांविरुद्ध गुन्हा दाखल केला आहे.

पोलिसांच्या माहितीनुसार, कर्मभूमी इन्फ्राटेक रियल्टी लिमिटेड असे कंपनीचे नाव आहे. कंपनीचे मुख्यालय मथुरा येथे आहे. कंपनीने 2013 मध्ये फोंडा, गोवा आणि 2018 मध्ये म्हापसा शहरात ऑफिस सुरू केले होते. कंपनीने विविध योजनांद्वारे गुंतवणूकदारांना जास्त परताव्याचे आमिष दाखवले होते. त्यामुळे अनेक गुंतवणूकदार या योजनांकडे आकर्षित झाले. जास्त व्याजाची लालूच दाखवून कंपनीने सुमारे 1000 गुंतवणूकदारांकडून 10 कोटी रुपये जमा केले.

सुरूवातीच्या काळात काही लोकांना पैसे करत केले गेले, मात्र गेल्या तीन वर्षांपासून कंपनीने एकाही गुंतवणूकदाराला पैसे परत केलेले नाहीत. त्यामुळे हवालदिल झालेल्या गुंतवणूकदारांनी आर्थिक गुन्हे शाखेत कंपनीचा अध्यक्ष देवेंद्र पाल सिंह, व्यवस्थापकीय संचालक मनोज कुमार सेंगर आणि विभागीय व्यवस्थापक नीलेश सुर्वे यांच्याविरोधात तक्रार केली, त्यानुसार गुन्हा दाखल झाला आहे.

ऑगस्ट 2022 मध्ये उत्तर प्रदेशातील वाराणसीमध्ये उत्तर प्रदेश पोलिसांनी दोघांना अटक केली होती. या दोघांनी 10 राज्यांतील लोकांकडून चार वर्षात पैसे दुप्पट करण्याचे आमिष दाखवून 300 कोटी रुपयांची फसवणूक केल्याचा आरोप आहे.