पणजी: पणजी विधानसभा मतदारसंघात आगामी निवडणुका डोळ्यासमोर ठेवत सत्ताधाऱ्यांकडून मतपेढीची तयारी सुरु असल्याचा गंभीर आरोप भाजपचे बंडखोर नेते उत्पल पर्रीकर यांनी केला. 2019 च्या पोटनिवडणुकीत अपक्ष उमेदवाराविरोधात केवळ साडेसहाशे मतांच्या फरकाने विजयी झालेले सध्याचे मंत्री आगामी निवडणुकीसाठी मोती डोंगरसारखी विश्वासू मतपेढी तयार करण्याच्या प्रयत्नात आहेत, असा हल्लाबोल पर्रीकर यांनी शुक्रवारी (23 मे) पत्रकार परिषद घेऊन केला.

या संदर्भात बोलताना त्यांनी दावा केला की, निवडणूक प्रक्रियेत हस्तक्षेप करण्याच्या हेतूने एकाच वेळी तब्बल 28 मतदान केंद्र अधिकाऱ्यांना हटवण्यात आले आहे. ही बाब केवळ सामान्य प्रशासनिक बदल नसून सत्ताधाऱ्यांकडून निवडणूक (Election) यंत्रणेत हस्तक्षेपाचा प्रयत्न असल्याचा आरोप त्यांनी केला. विशेष म्हणजे, ज्यांच्याकडे हे खाते आहे, तेच सध्या पणजीचे आमदार आणि राज्य सरकारमधील मंत्री आहेत. त्यामुळे या कृतीकडे अत्यंत संशयाच्या नजरेने पाहिले पाहिजे, असे पर्रीकर म्हणाले.

निवडणूक यादीतील नाव समावेशावर प्रश्नचिन्ह

निवडणूक प्रक्रियेसंदर्भात आणखी एक गंभीर मुद्दा उपस्थित करत उत्पल पर्रीकर यांनी सांगितले की, निवडणूक यादीत नाव समाविष्ट करण्यासाठी केवळ आधार कार्डाची छायांकित प्रत पुरेशी ठरत नाही. कारण आधारकार्ड हे नागरिकत्व सिद्ध करणारे दस्तऐवज नाही. त्यामुळे अशा प्रकारे मोठ्या प्रमाणात बाहेरील लोकांची नावे यादीत घालण्याचे प्रयत्न होत असल्याचा संशय त्यांनी व्यक्त केला.

या पार्श्वभूमीवर, त्यांनी सांगितले की, हा प्रकार रोखण्यासाठी तालुक्याच्या मामलेदारांकडे तक्रार नोंदवली जाणार आहे. आवश्यकता भासल्यास राज्य निवडणूक आयुक्तांकडेही निवेदन दिले जाईल. एवढेच नव्हे तर न्यायालयीन लढ्यालाही ते तयार असल्याचे त्यांनी स्पष्ट केले.

राजकीय वातावरण तापणार?

उत्पल पर्रीकर यांच्या आरोपांमुळे पणजीतील राजकीय वातावरण पुन्हा एकदा तापण्याची शक्यता आहे. भाजपमधून (BJP) अपक्ष उमेदवार म्हणून निवडणूक लढवणाऱ्या आणि माजी मुख्यमंत्री मनोहर पर्रीकर यांचे सुपुत्र असलेल्या उत्पल पर्रीकर यांनी पुन्हा एकदा सत्ताधाऱ्यांविरोधात आक्रमक भूमिका घेतली आहे.