Rain At National Games Goa: गोव्यात बुधवारी पहाटे 05 वा. गडगडाटासह दमदार पाऊस बरसल्याने नागरिकांची तारांबळ उडाली. सकाळी काही प्रमाणात वाहतुकीवरदेखील परिणाम दिसून आला. आकस्मित मोठ्या प्रमाणात पडलेल्या पावसामुळे राज्यात सुरू असलेल्या 37व्या राष्ट्रीय क्रीडा स्पर्धेवरदेखील परिणाम दिसून आला. क्रीडा ग्राम आवाराला तळ्याचे स्वरूप प्राप्त झाले होते.

क्रीडा स्पर्धेसाठी आणण्यात आलेले जनरेटर तसेच इतर साहित्य भिजून गेले; परंतु अवघ्या काही तासांत पुन्हा नियोजन करून स्पर्धा सुरळीतपणे सुरू करण्यात आल्या. गोवा वेधशाळेद्वारे आज, उद्या यलो अलर्ट जारी करण्यात आला आहे

शिवोलीत कोसळले झाड

बुधवारी पहाटे अचानक झालेल्या जोरदार वारा तसेच पावसामुळे शिवोली- सडयेत अनेक ठिकाणी झाडांची पडझड झाली तर सडयें होली क्रॉस हायस्कूलला लागून असलेल्या रस्त्याशेजारचे भलेमोठे आंब्याचे झाड मुळासकट कोसळून पडल्याने या भागातील वाहतुकीत अडथळा निर्माण झाला होता.

घोलान मार्ना येथील शाम धारगळकर यांच्या राहात्या घरावर झाडाची फांदी तुटून पडल्याने घरावरील पत्र्यांची नासधूस झाली.

पेडे स्पोर्ट्स कॉम्प्लेक्समध्येही पाणी

म्हापसा येथील पेडे स्पोर्ट्स कॉम्प्लेक्समध्ये राष्ट्रीय क्रीडा स्पर्धेला अवकाळी पावसाचा फटका बसल्याचे बुधवारी पाहायला मिळाले. खेळाडू तसेच इतर प्रतिनिधींसाठी जेवण बनविण्यासाठी उभारलेल्या स्वयंपाक तंबूमध्ये मोठ्या प्रमाणात पाणी भरले. त्यामुळे व्यवस्थापन तसेच कर्मचाऱ्यांची मोठी तारांबळ उडाली.

परिणामी, कर्मचाऱ्यांना या तंबूमधील साहित्य दुसऱ्या तंबूत हलविण्याची वेळ आली. कालांतराने व्यवस्थापनाने या स्थितीवर नियंत्रण मिळवले.

"पावसामुळे काही स्पर्धाच्या वेळेत बदल करावा लागला. आज रात्रीपर्यंत बहुतांशी स्पर्धा संपुष्टात येतील. केवळ सायकलिंग स्पर्धा बाकी आहेत. या स्पर्धेमध्ये पाऊस पडला तरी व्यत्यय येणार नाही; कारण ती आऊटडोअर स्पर्धा आहे. अग्रिशमन, साबांखा, वीज खाते यांनी उत्तमरीत्या कामगिरी बजावल्याने स्थिती आटोक्यात आणण्यास मदत झाली," असे राज्याचे क्रीडामंत्री गोविंद गावडे म्हणाले.