गोव्यात आज (सोमवार, दि.06) दोन केंद्रीय मंत्री असून, ते दोन वेगवेगळ्या परिषदांना संबोधित करणार आहेत. केंद्रीय संरक्षणमंत्री आणि केंद्रीय कायदामंत्री आज गोव्यात असतील, त्यापैकी कायदामंत्री किरण रिजिजू रविवारी रात्री गोव्यात दाखल झाले आहेत. दाबोळी विमानतळावर राज शिष्टाचारमंत्री माविन गुदिन्हो यांनी रिजिजू यांचे स्वागत केले.

कायदामंत्री किरण रिजिजू गोव्यात होत असलेल्या 23 व्या कॉमनवेल्थ कायदा परिषदेच्या उद्धाटन समारंभला उपस्थिती लावणार आहेत. यावेळी कायदा परिषदेला रिजिजू संबोधित करतील. कॉमनवेल्थ परिषद कायदातज्ञ आणि अभ्यासकांना व्यासपीठ उपलब्ध करून देत विविध महत्त्वाच्या मुद्द्यांवर विचारमंथन करते. असे ट्विट किरण रिजिजू यांनी केले आहे.

मंत्री माविन गुदिन्हो यांनी दाबोळी विमानतळावर किरण रिजिजू यांचे स्वागत करतानाचे फोटो ट्विटरवर शेअर केले आहेत.

तसेच, नौदल कमांडर्ससाठी लष्करी-सामरिक पातळीवर सुरक्षेच्या महत्त्वपूर्ण मुद्द्यांवर चर्चा करण्यासाठी, नौदल कमांडर्स परिषद 2023 चा पहिला टप्पा 06 मार्चपासून सुरू होत आहे. गोव्यात होत असलेल्या या परिषदेच्या पहिल्या दिवशी संरक्षण मंत्री राजनाथ सिंह हजेरी लावणार असून, ते आय एन एस विक्रांतच्या नौदल कमांडर्सना संबोधित करतील.

परिषदेचा पहिला टप्पा समुद्रात आयोजित करण्यात आला आहे. विशेष म्हणजे प्रथमच भारताची पहिली स्वदेशी विमानवाहू नौका आय एन एस विक्रांत जहाजावर ही परिषद होणार आहे.