Goa Accident Death: झुआरीनगर येथे झालेल्‍या अपघातात कारगाडीच्या चाकाखाली सापडून एक महिला जागीच ठार झाली. भाड्याच्या दुचाकीने आलेल्या पर्यटक जोडप्याने महामार्गावर नादुरुस्त झालेल्या कारला धडक दिल्याने हा अपघात झाला.

कारला धडक दिल्यानंतर दुचाकीवर मागे बसलेली महिला उसळून रस्त्याच्या मध्यभागी पडल्याने मागून येणाऱ्या दुसऱ्या एका कारच्या चाकाखाली ती सापडली व तिचा जागीच मृत्यू झाला, तर चालक तिचा पती गंभीर जखमी झाला.

ही घटना आज दुपारी 12.30 वाजण्‍याच्‍या सुमारास घडली. जीए - 06 - टी - 5276 क्रमांकाच्या दुचाकीवरून दिल्ली येथील हे दांपत्य वेर्णाहून दाबोळी विमानतळाकडे जात होते. 10 नोव्हेंबर रोजी ते गोव्यात आले होते व त्या दिवसापासून दुचाकी त्यांनी भाड्याने घेतली होती. आज दुचाकी मालकाकडे सुपूर्द करून ते विमानाने दिल्लीला जाणार होते.