काणकोण: मडगाव- कारवार हमरस्त्यालगत असलेल्या काणकोण लोलये पंचायत क्षेत्रातील फिरते गाडेधारक, दुकानदार व घर मालकांना सार्वजनिक बांधकाम खात्याने नोटिसा बजावल्याने सर्वांवर संक्रांत आली आहे. गाडेधारकांवर बेकारीची कुऱ्हाड कोसळली आहे. गेल्या आठवड्यात बांधकाम खात्याने त्यांना गाडे हटविण्याची नोटीस दिली होती, त्याची मुदत सोमवारी संपली. काही गाडेधारकांनी सार्वजनिक बांधकाम खात्याने गाडे हटविण्यासाठी नोटीस दिल्यापासून गाडे बंद ठेवणे पसंत केले आहे.

लोलये पंचायत क्षेत्रात दापट,माड्डीतळप पोळे येथे सुमारे वीस फिरत्या गाडेधारकांना पंचायतीने व्यवसायास परवानगी दिली होती, असे सरपंच सचिन नाईक यांनी सांगितले. गेली 15 वर्षे व्यवसाय करणाऱ्यांना गाडे हटविण्याची नोटीस बांधकाम खात्याने दिल्याने ते सैरभैर झाले आहेत. 13 वर्षे दामट- माशे येथे रस आॅम्लेट,भाजीचा व्यवसाय करत आहे. तो बंद पडल्यास पोट भरणे कठीण आहे,त्यामुळे पुनर्वसन करावी,अशी मागणी भिकू पागी यांनी केली आह

चौपदरी रस्ता काम सुरू होईपर्यंत मुदत द्या !

चौपदरी रस्त्याचे काम सुरू होईपर्यंत या गाडे धारकांना व्यवसायाची मुभा देण्याची मागणी सरपंच सचिन नाईक यांनी केली आहे. मडगाव- कारवार मार्गावर माशे ते पोळे पर्यंतच्या हमरस्त्यालगत गेली अनेक वर्षे व्यवसाय करणाऱ्या गाडे धारकांनी चारपदरी रस्त्याचे बांधकाम सुरू होईंपर्यंत व्यवसाय करण्याची मुदत द्यावी,अशी मागणी सार्वजनिक बांधकाम खात्याकडे केली आहे.ज्या दिवशी चार पदरी रस्त्याचे काम सुरू होईल, त्यावेळी स्वतः हून गाडे हटवू,असे दापट- लोलये येथील एक गाडे धारक भिकू पागी यांनी सांगितले.

घरे, दुकान मालकानांही नोटिसा

तळपण ते पोळे पर्यंतच्या हमरस्त्यालगतची घर मालक व दुकान मालकांनाही सार्वजनिक बांधकाम खात्याने नोटिसा बजाविल्या आहेत.मात्र, काही दुकानदार व घरमालकांनी याला आक्षेप घेतला आहे. गालजीबाग येथे काही घरांनाही नोटिसा बजावल्या आहेत.