UK woman died in Agonda Goa: युके येथील विदेशी महिलेचा मंगळवारी रात्री आगोंद किनाऱ्यावर मृतदेह आढळला होता. महिलेचे निधन डोक्याला व स्पायनल कॉर्डला दुखापत झाल्याने झाल्याचे शवचिकित्सा अहवालात स्पष्ट झाले आहे.

पोलिसांनी रात्रीच पंचनामा करून मृतदेह ताब्यात घेतला होता. त्यानंतर गुरुवारी शवचिकित्सा अहवाल समोर आला.

एमा लुईस असे या ब्रिटीश महिलेचे नाव असून, उंचावरून पडल्याने त्यांच्या डोक्याला व स्पायनल कॉर्डला दुखापत झाली, असे अहवालात म्हटले आहे.

शवविच्छेदन अहवालात महिलेच्या मणक्याचे फ्रॅक्चर आणि मेंदूतील रक्तस्त्राव (अंतर्गत रक्तस्त्राव) झाल्याचे स्पष्ट झाले आहे. महिला पडल्यानंतर ती बेशुद्ध पडली त्यानंतर बराचवेळ तिच्याकडे लक्ष न दिल्याने तिचा मृत्यू झाला, असे पोलीस निरीक्षक चंद्रकांत गावस यांनी सांगितले.

पण, महिला कशामुळे खाली पडली याचे कारण अद्याप समोर आलेले नाही.

मृतदेह ताब्यात घेण्यात आला त्यावेळी महिलेच्या शरिरावर कोणतीही इजा झाल्याचे दिसून आले नव्हते. तसेच, तिच्या वस्तू, मोबाईल हे सर्व घटनास्थळी आढळून आले होते, असेही पोलिसांनी सांगितले.

ब्रिटीश दूतावासाकडून परवानगी मिळाल्यानंतर त्यांच्या मृतदेहाची वैद्यकीय तपासणी करण्यात आली, असे काणकोणचे पोलिस निरीक्षक चंद्रकांत गावस यांनी सांगितले.

मात्र, 'बायलांचो एकवट'च्या प्रमुख आवडा व्हिएगश यांनी या घटनेची चौकशी करण्याची मागणी पोलिस प्रमुखांकडे केली होती.