Uber Taxi Service will start in Goa: गोव्यात लवकरच उबर टॅक्सी सेवा सुरू होणार असल्याची माहिती आहे. याबाबत अद्याप अधिकृतपणे कुणीही माहिती दिलेली नाही. तथापि, मोपा येथील मनोहर आंतरराष्ट्रीय विमानतळावरून पिक अप आणि ड्रॉप ऑफ सेवा उबर पुरविणार असल्याची माहिती आहे. हॉटेल ते विमानतळ आणि विमानतळ ते हॉटेल अशी ही सेवा असणार आहे, असे कळते.

गोवा हे आंतरराष्ट्रीय पर्यटनस्थळ आहे. येथे ओला, उबर सारख्या अॅप आधारीत टॅक्सी सेवा सुरू करण्याबाबत चर्चा होत आल्या आहेत. तथापि, स्थानिक टॅक्सी चालकांचा या सेवांना कायम विरोध राहिला आहे.

तसेच गोव्यात अद्याप स्थानिक टॅक्सी चालकांचे अनेक प्रश्न सुटायचे आहेत. मोपा विमानतळावर स्थानिकांना स्वतंत्र टॅक्सी काऊंटर हवे आहे.

त्यामुळे उबर सेवा राज्यात सुरू होत असेल तर त्यावर स्थानिक टॅक्सी चालक, मालकांची प्रतिक्रिया महत्वाची ठरणार आहे. दरम्यान, दुसरीकडे राज्याबाहेरील पर्यटक मात्र ओला, उबेर टॅक्सी सेवा असली पाहिजे, या मताचे आहे.

त्यातून पर्यटकांकडे वाहतूक सेवेचा एक पर्याय नेहमी राहिल, तसेच स्पर्धेमुळे पर्यटकांचा फायदा होईल, असेही बोलले जात आहे.