Goa Accident: वाळपई परिसरात आज बुधवारी झालेल्या वेगवेगळ्या दोन अपघातांत दोघेजण गंभीर जखमी झाले. रेडेघाट-सत्तरी येथे दुचाकी व बोलेरो पिकअप यांच्यात अपघात झाला. बोलेरो पिकअप चालकाने दुचाकीला पाठीमागून धडक देऊन तो घटनास्थळावरून पसार झाला. यात दुचाकीस्वार साईप्रसाद नाईक रा.मासोर्डे सत्तरी हे गंभीर जखमी झाले.

वाळपई पोलिसांनी घटनेचा पंचनामा केला. बोलेरो पिकअप गाडी ताब्यात घेतली आहे. दरम्यान साईप्रसाद हा गंभीर जखमी झाला असून त्याला गोमॅकोत दाखल केले आहे. बोलेरो पिकअप ही वाळपई येथे खान नामक व्यक्तीची असून दूध पुरवठा करते.

दरम्यान, दुसरा अपघात नाणूस वाळपई येथे सॅंट्रो कार व ॲक्टीव्हा स्कूटर यामध्ये झाला असून त्यात स्कूटर चालक गजानन देसाई (२२) रा. अडवई सत्तरी येथे गंभीर जखमी झाला आहे. त्याची प्रकृती चिंताजनक आहे.

प्राप्त माहितीनुसार सॅंट्रो कार ही वाळपईतून नाणूस येथे पोहचली होती, तर स्कूटर अडवईहून वाळपईच्या दिशेने जात होती.तेव्हा हा समोरासमोर धडक होऊन हा अपघात झाला. यात गजानन सॅंट्रोवर उसळला, त्यामुळे डोके कारच्या समोरील काचेवर आदळले, तर पायालाही मोठी जखम झाली आहे.

तातडीने त्याला गोमेकॉत पाठविण्यात आले. सॅंट्रो कार ही महाराष्ट्र पासिंगची असून नाणूस येथील एका व्यक्तीची असल्याचे कळते. दरम्यान, दोन्ही अपघातांचा तपास वाळपई पोलिस निरीक्षक दिनेश गडेकर यांच्या मार्गदर्शनाखाली शिपाई झिंगू गावकर करत आहेत.