फोंडा: माजी आमदार लवू मामलेदार यांचा शनिवारी बेळगावात मृत्यू झाला. कॅब चालकाशी झालेल्या किरकोळ वादातून त्यांना मारहाण झाली. आणि लॉजमध्ये जाताना मामलेदार कोसळले. लवू यांचा शवचिकित्सा अहवाल समोर आला असून, या अहवालानंतर त्यांच्या मृत्यूचा तिढा आणखी वाढला आहे.
लवू मामलेदार यांच्या समोर आलेल्या शवचिकित्सा अहवालानुसार, मामलेदार यांच्या शरीराच्या मागे काळे डाग आहेत. त्यांच्या शरीरावर इतर कोणत्याही मोठ्या जखमा आढळून आलेल्या नाहीत. अहवालातून मामलेदार यांच्या मृत्यूचे नेमके कारण स्पष्ट झालेले नाही. दरम्यान, रासायनिक विश्लेषण आणि हिस्टोपॅथोलॉजी अहवाल अद्याप प्रलंबित आहे. यातून त्यांच्या मृत्यूचे नेमके कारण समोर येण्याची शक्यता आहे.
लवू मामलेदार बेळगावात गेले असता खडेबाझार परिसरात त्यांची कार एका रिक्षा तथा कॅब चालकाला धडकली. लवू यांनी माफी देखील मागितली पण, संतापलेल्या रिक्षा चालकाने लॉज परिसरात जात मामलेदार यांच्यावर हल्ला करत मारहाण केली. यानंतर लॉजमध्ये गेलेले मामलेदार रिसेप्शनजवळ कोसळले. त्यांना रुग्णालयात दाखल केले असता, डॉक्टरांनी मृत घोषित केले.
बेळगाव पोलिसांनी याप्रकरणी अमिर सुहेल सनदी या रिक्षा तथा कॅब चालकाला खुनाचा गुन्हा दाखल करत अटक केली आहे. सनदीला न्यायालयासमोर हजर केले असता त्याला १४ दिवसांची न्यायालयीन कोठडी सुनावण्यात आली आहे. दरम्यान, शवचिकित्सा अहवालातून समोर आलेल्या माहितीमुळे मामलेदार मृत्यू प्रकरणाचा तिढा वाढला आहे. व्हिसेरा अहवालातून आणखी खुलासा होण्याची शक्यता आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.