Goa - Mumbai Flight: टीव्ही अभिनेता जय भानुशालीने अकासा विमान वाहतूक कंपनीच्या विमानसेवेबाबत टीका केली आहे. गोव्याहून मुंबईला दुपारी 1 वाजताचे विमानाला उशीर झाल्याने जयने संताप व्यक्त केला आहे.

बिग बॉस 15 फेम जय भानुशालीने एअरलाइन कंपनीच्या सेवेबद्दल निराशा व्यक्त केली. कंपनीला जाब विचारत त्याने लवकरात लवकर बरे व्हा असा खोचक टोला देखील लगावला आहे.

'प्रिय AkasaAir तुम्ही लवकर बरे व्हावे हीच इच्छा आहे, कारण गैरव्यवस्थापन हे Akasa airline चे दुसरे नाव आहे. गोवा ते मुंबई जाणारी दुपारी 1 ची फ्लाईट होती पण विमानाला 4 वाजेपर्यंत उशीर झाला. याबाबत कोणताही संदेश किंवा पूर्व सूचना देण्यात आली नाही...तुम्ही एक ग्राहक म्हणून मला गमावले आहे,' असे जयने ट्विटमध्ये म्हटले आहे.

दरम्यान, कंपनीने देखील जयने केलेल्या ट्विटला उत्तर दिले आहे. 'नमस्कार जय, तुम्हाला गैरसोय झाल्याबद्दल आम्ही दिलगीर आहोत. तुमची गोवा-मुंबई QP1395 ही फ्लाइटला खराब हवामानामुळे दिल्लीहून येण्यास उशीर झाला. फ्लाईट विलंबाबाबत आम्ही तुमच्या नोंदणीकृत संपर्क क्रमांकावर एसएमएस आणि ईमेल पाठवला आहे,' असे अकासा कंपनीने उत्तर दिले आहे.

जय भानुशाली 15 वर्षांहून अधिक काळ इंडस्ट्रीत काम करत आहेत. त्याने कसौटी जिंदगी की, कायमंथ, किस देश में है मेरा दिल आणि अशा अनेक टीव्ही मालिकेत काम केले आहे. सध्या तो 'हम रहे ना रहे हम' या शोमध्ये टीना दत्ताच्या विरोधात मुख्य भूमिका साकारत आहे.