Truck Driver Hits Height Barrier At Khandola: येथील उच्च माध्यमिक विद्यालयाजवळ शुक्रवारी संध्याकाळी ७.४५ च्या दरम्यान एका मालवाहू ट्रकने बगलमार्गावरील लोखंडी कमानीला जोरदार धडक दिली. त्या धडकेत ट्रकचालक जागीच ठार झाला. ट्रकचा दर्शनी भाग आणि केबीनचा चक्काचूर झाला.

ट्रक (केए ५२ बी ७२२१) माशेलहून गवंडाळी पूलमार्गे पणजीच्या दिशेने जात असताना हा अपघात घडला. या घटनेची माहिती मिळताच कुंडई अग्निशमन दलाचे जवान घटनास्थळी पोहोचले.

त्यांनी तेथील नागरिकांच्या सहकार्याने त्या ड्रायव्हरला केबिनमधून ओढून बाहेर काढले. त्यावेळी ते गंभीर जखमी झाले होते. रुग्णवाहिकेतून घटनास्थळी पोहोचली. परंतु त्याचा काहीच उपयोग झाला नाही. रुग्णवाहिकेतील डॉक्टरने त्या चालकाला मृत घोषित केले. 

म्हार्दोळ पोलिस स्थानकाचे हवालदार सामीर साळुंके यांच्या मार्गदर्शनाखाली पंचनामा करण्यात आला. उत्तरीय तपासणीसाठी गोमेकॉत पाठविण्यात आले. जवळ कोणतेच ओळखपत्र सापडले नाही. फक्त त्याच्याजवळ असलेल्या मोबाईलवरून त्याची माहिती पोलिस घेण्याचा प्रयत्न करीत आहेत.

पोलिसांचे दुर्लक्ष

पंधरा दिवसा पूर्वीही रात्री 12 वा. अशाच प्रकारे ट्रकने धडक दिली होती. त्यावेळी सुदैवाने मोठी हानी झाली नव्हती. हा अवजड वाहनांना मार्ग बंद आहे. तरीसुद्धा या मार्गावर वाहने येतात.

त्यामुळे अनेक वेळ असे अपघात होतात, तसेच वाहतूक कोंडीही होते. माशेलातील पोलिसांचे दुर्लक्ष होते. चुकीच्या मार्गाने जाणाऱ्या ट्रकना अडविले पाहिजे. माशेल बाजार, बगलमार्गावर बंदीचा फलक लावणे अवश्य आहे, असे मत स्थानिक नागरिकांनी व्यक्त केले.

वडापाव गाड्याचे नुकसान

ट्रॅकने त्या कमानीला धडक दिल्यानंतर त्याच जोशात त्याने ट्रक मागे घेण्याचा प्रयत्न केला असता तेथील रस्त्याच्या कडेला असलेल्या एका वडा पाव गाड्याला धडक दिली. त्यामुळे त्या गाड्याचेही बरेच नुकसान झाले आहे. या गाड्याजवळ इतरही गाडे, दुकाने आहेत.