मोरजी : मोपा लिंक रोडसाठी शेवटची झाडे 7 मार्च रोजी बुलडोझरने कापण्यात आली आहेत. यानंतर स्थानिकांचा विरोध डावलून आता रस्त्याचे खोदकाम युद्धपातळीवर चालू आहे. हे काम करत असताना मोजक्याच पोलिसांचा फौजफाटा घेऊन काम सुरु झाल्याचं चित्र पाहावयास मिळत आहे. (Mopa Link Road News Updates)

एकीकडे मोपा (Mopa) लिंक रोडसाठी जमीन संपादनाची प्रक्रिया चुकीच्या मार्गाने केल्याची पीडित शेतकऱ्यांनी याचिका उच्च न्यायालयात दाखल करण्यात आली आहे. त्याची सुनावणी 25 मार्च रोजी होणार आहे, मात्र दुसऱ्या बाजूने वारखंड पंचायतीने लिंक रोड बनवणाऱ्या कंपनीला बेकायदा रस्ता करत असल्याचा त्वरित बंद करावा अशी नोटीस पाठवली आहेत. या नोटिसीला आव्हान देताना कंपनीने पंचायत संचालनालयाकडून स्थगिती मिळवलेली आहे. 15 ऑगस्ट रोजी याप्रकरणी सुनावणी होणार आहे.

आताच मोपा लिंक रोडसाठी परवाना मिळाला आहे का अशी विचारणा राज्य (Goa) पर्यावरण पडताळणी प्राधिकरणाकडून करण्यात आली आहे. परवाना नसेल तर त्याबद्दल प्राधिकरणाने स्पष्टीकरण मागितले आहे. स्पष्टीकरण सादर करण्यासाठी एका आठवड्याची मुदत देण्यात आली आहे. सार्वजनिक बांधकाम खात्याच्या मुख्य अभियंत्यांना खात्याने नोटीस पाठवल्याची माहिती आहे. पेडणे (Pernem) तालुक्यातील मोपा विमानतळासाठी मोठ्या प्रमाणात झाडांची कत्तल केली जात आहे अशी तक्रार प्राधिकरणाकडे करण्यात आली आहे.

झाडांची कत्तल करत नैसर्गिक स्त्रोत नष्ट केले जात आहेत. मोपा लिंक रोडमुळे जंगली प्राण्यांचे अस्तित्व धोक्यात येत आहे. तसंच या रस्त्यासाठी पर्यावरण मान्यता घेण्यात आलेली नाही, असेही तक्रारदारांचं म्हणणं आहे. दरम्यान 7 मार्च रोजी मोपा लिंक रस्ता करणाऱ्या कंपनीने जी शेवटची झाडे होती, ती कापून टाकली आणि आज मंगळवारपासून मोठ्या प्रमाणात खोदकाम करणारी यंत्रणा आणि जमीन सपाटीकरण करण्याचं काम युद्धपातळीवर सुरु केलं आहे