Goa: जगात हवामानात बदल होत असून आत्तापासून अक्षय ऊर्जेला प्राधान्य देण्याची आवश्‍यकता आहे. हरित उद्योगात गुंतवणूक करून शाश्‍वत पद्धतीने, तसेच युवा आणि नागरिकांमध्ये जागरूकता निर्माण करून पुढे जाण्याची आवश्‍यकता आहे, असे वाहतूकमंत्री माविन गुदिन्हो यांनी स्पष्ट केले.

दोना पावला येथे असोचॅमद्वारे आयोजित हरित गुंतवणूक आणि शाश्‍वत परिषदेत ते मुख्य अतिथी म्हणून बोलत होते. गुदिन्हो यांच्या हस्ते दोन दिवसीय परिषदेचे उद्‍घाटन झाले. यावेळी सोबत असोचॅमचे अध्यक्ष विनोद पांडे, असोचॅम गोवा विभागाचे सहअध्यक्ष सागर साळगावकर, सुधीर पाठक, मॉझ वसवडावाल, चाको जुझे, व इतर मान्यवर उपस्थित होते.

पूर्वी नोव्हेंबरमध्ये पाऊस पडत नव्हता, परंतु आत्ता डिसेंबरमध्येही पाऊस पडतो. भविष्यात गोव्यात बर्फ देखील पडेल. पर्यावरणाची काळजी न केल्यामुळे, निसर्ग आमच्यावर पलटवार करत आहे. अक्षय ऊर्जेचा वापर होणे आवश्‍यक आहे. अभ्यासक्रमात हरित क्रांती आणि त्याचे फायदे याचा समावेश करण्याची वेळ आली आहे. जागरूकता केल्यास हे शक्य होणार आहे, असे गुदिन्हो म्हणाले.