फातोर्डा: कोविड महामारीच्या (Covid 19) पहिल्या पेक्षा दुसऱ्या लाटेत हजारो लोकांना कठीण परिस्थितीचा समना करावा लागला. डॉक्टर, परिचारिका व आरोग्य कर्मचाऱ्यांना (Health workers) रुग्णांची तपासणी, त्यांची देखभाल करताना अनेक समस्या जाणवल्या. जास्त करुन परिचारिकांना मानसिक व भावनिक त्रास झाला. आता कोविडची तिसरी लाट येणार असे भाकित केले जात असताना दक्षिण गोवा जिल्हा इस्पितळात वरील समस्या जाणवू नये म्हणून डॉक्टर, परिचारिका व कर्मचाऱ्यांना प्रशिक्षण देण्यात येत आहे. शिवाय इस्पितळातील सोयी-सुविधा, साधन सुविधांमध्ये वाढ करण्याबरोबरच व्यवस्थापनात दोष राहु नये या साठी उपाययोजनांचा विचार व तयार करण्यात येत आहे. (Training was imparted to the nurses and staff at South Goa District Hospital)

हल्लीच कॅनडा स्थित मानसिक रोग  व चिंतन प्रशिक्षण तज्ञ  लिसा पिंटो यांच्या मार्फत परिचारिकांना प्रशिक्षण देण्यात आले. यात हॉस्पिसियो मडगाव व दक्षिण गोवा जिल्हा इस्पितळातील 40 परिचारीकांनी भाग घेतला. या मार्गदर्शनामुळे आमच्यावरील मानसिक भार बऱ्याच अंशी कमी झाला. आमची मानसिक स्थिती मजबुत बनली आहे व आमचा आत्मविश्र्वासातही भर पडली असल्याचे काही परिचारीकांनी सांगितले.

दरम्यान, तिसऱ्या लाटेची शक्यता लक्षात घेऊन दक्षिण गोवा जिल्हा इस्पितळातील व्यवस्थेत वाढ करण्यात येत आहे. खास करुन बालकांसाठीच्या कक्षावर जास्त लक्ष देण्यात येत आहे. अजुन पर्यंत या इस्पितळात 5200 रुग्णांची नोंदणी झाली व सर्वांवर योग्य प्रकारे उपचार करण्यात आले. तरी सुद्धा तिसऱ्या लाटेला तोंड देण्यासाठीची तयारी जोरात चालू असल्याचे नोडल अधिकारी डॉ. राजेश पाटील यांनी पत्रकारांना सांगितले.

इस्पितळात किती वेंटिलेर्स आहे त्याची पाहणी करण्यात येत आहे. बालकांचा कक्षाचा दर्जा उंचावण्यात येत आहे. कॅज्युअल्टी युनिट जवळच हाय डिपेन्डन्सी युनिट सुरु करण्यात आला आहे. त्यामुळे अतिगंभीर रुग्णांवर तात्काळ उपचार करणे शक्य होणार असल्याचे डॉ. पाटील यांनी सांगितले.

कोविडातुन तंदुरुस्त झालेल्या रुग्णांनाही जवळ जवळ तीन महिने काहीना काही त्रास जाणवतो. अशा रुग्णांची तपासणी, देखभाल करण्यासाठी खास कक्ष सुरु करण्यात आला आहे. शिवाय आयुश केंद्रही सुरु करण्यात आले आहे. त्यामुळे आयुर्वेदीक उपचाराची सोय इथे करण्यात आली आहे.  पोझिटीव असलेल्या रुग्णांचे स्वाब घेऊन व त्यांची तपासणी केली जाईल. अहवाल आल्यावर रुग्णाला योग्य तो उपचार देणे त्यामुळे शक्य होणार असल्याचे डॉ. पाटील यांनी स्पष्ट केले.