काणकोण: रस्त्याच्या मधोमध सुरु असलेली बैलांची झुंज एका ४० वर्षीय व्यक्तीच्या जीवावर बेतली आहे. झुंज करणारे बैल दुचाकीवर असलेल्या व्यक्तीच्या अंगावर गेले आणि तो खाली कोसळला. यात त्याच्या डोक्याला गंभीर जखम झाली. गोमेकॉत उपचारादरम्यान शनिवारी (०४ डिसेंबर) या वक्तीचा मृत्यू झाला आहे.

जया वरक ( श्रीस्थळ, कोणकोण) असे या अपघातात मृत झालेल्या व्यक्तीचे नाव आहे. मिळालेल्या माहितीनुसार श्रीस्थळ येथे रस्त्याच्या मधोमध दोन बैलांची झुंज सुरु होती. दरम्यान, यावेळी रस्त्यावरुन जात असलेल्या जया यांच्यावर दोन्ही बैल आले. यामुळे जया दुचाकीवरुन खाली कोसळले. यामध्ये त्यांच्या डोक्याला गंभीर दुखापत झाली.

जखमी वरक यांना सुरुवातीला काणकोण प्राथमिक रुग्णालयात दाखल करण्यात आले. तब्येत अधिकच बिघडल्याने त्यांना पुढील उपचारासाठी बांबोळी येथील गोवा वैद्यकीय महाविद्यालयाच्या रुग्णालयात दाखल केले. दरम्यान, चार उपचारानंतर देखील या व्यक्तीची मृत्यूशी झुंज अपयशी ठरली आहे. शनिवारी (०४ डिसेंबर) रोजी या वक्तीचा मृत्यू झाला.

पोलिसांनी घटनेचा पंचनामा केला असून, अनैसर्गिक मृत्यूची नोंद केली आहे. शवविच्छेदनानंतर मृतदेह नातेवाईकांच्या स्वाधीन करण्यात आला.