वास्को: वास्को गोवा शिपयार्ड कंपनीसमोर कंपनीतील कर्मचारी मोठ्या प्रमाणात दुचाकी वाहन पार्क करून वाहतुक नियमांचे उल्लंघन करीत असल्याचे वाहतुक पोलिसांच्या नजरेस आलेे. यामूळे वाहतुक पोलिसांनी धडक कारवाई करत गोवा शिपयार्ड कंपनीच्या सर्व दुचाकी वाहन चालकांवर दंडात्मक कारवाई केली.

(Traffic Police action on vasco Goa Shipyard company illegal vehicle parking)

गेल्या अनेक दिवसांपासून दुचाकी वाहने गोवा शिपयार्ड समोरील बसस्थानकासमोर पार्क करतात आणि समोर असलेल्या गोवा शिपयार्ड आस्थापनात कामाला जातात. यामुळे नवेवाडे, वाडे भागातील नागरीकांना खाजगी बसमधून वास्कोकडे जाताना अडथळा निर्माण होतो. यामुळे रस्त्यावर उभे राहून खाजगी बसची वाट पाहावी लागते.

रस्त्यावर उभे राहील्याने भविष्यात प्रवाशांना अपघात होण्याची शक्यता नाकारता येत नाही. याविषयी प्रवाशांनी प्रसार माध्यमांचे तसेच वास्को वाहतुक पोलिसांचे बेकायदेशीर वाहन पार्ककडे लक्ष वेधले.

दरम्यान वास्को वाहतुक पोलिस निरीक्षक शैलेश नार्वेकर यांच्याकडे याबाबत तक्रार येताच, गोवा शिपयार्ड कंपनीने बसस्थानकासमोरील बेशिस्त वाहने पार्क करणार्‍यांवर दंडात्मक कारवाई केली. तसेच काही दुचाकी वाहन चालक नसल्याने त्यांची वाहने टोईंग करून वास्को पोलिस स्थानकावर आणून ठेवली.

यापुढे एकही दुचाकी वाहन गोवा शिपयार्ड बसस्थाकासमोर पार्क केल्यास दुचाकी वाहनचालकावर कडक कारवाई करून त्याचा वाहतुक परवाना ताब्यात घेतला जाईल. यासाठी गोवा शिपयार्ड कंपनीत कामासाठी वाहने योग्य ठिकाणी पार्क करावी. असे आवाहन वास्को वाहतुक पोलिस निरीक्षक शैलेश नार्वेकर यांनी केले.