Goa Traffic Issue: पणजी स्मार्ट सिटीच्या कामामुळे पणजी शहरात प्रचंड वाहतूक कोंडी होत असताना आता रायबंदर येथेदेखील ही समस्या सुरू झाली आहे. सकाळी आणि सायंकाळी वाहतूक कोंडीमुळे जुन्या रस्त्यावरून वाहतूक करणाऱ्यांची गैरसोय होत असून नाराजी व्यक्त केली जात आहे.

स्मार्ट सिटीच्या कामासाठी पणजीप्रमाणे रायबंदर येथेदेखील रस्ते खोदले गेले आहेत. जुना रस्ता अरूंद असल्याने येथे जागा कमी आहे. त्यात दोन्ही बाजूला काम सुरू असल्याने वाहतुकीवर याचा परिणाम होतो.

सकाळी आणि सायंकाळी शाळा, कचेरी वेळ असल्याने वाहतूक जास्त असते. त्यामुळे सतत वाहतूक कोंडी होण्याचे प्रकार घडत आहेत.

मुख्य म्हणजे संयम कमी असल्याने कोणीही थांबण्यास तयार नसतो. येथे वाहतूक पोलिस नसल्याने वाहतूक सुरळीतपणे चालणार याची खात्री करून घ्यायला कोणी नाही. त्यामुळे वाहतूक कोंडी होते. या सगळ्यात सर्वसामान्यांना त्रास होत आहे.

पणजी-फोंडा महामार्गावरही चिंबल नाक्यावर पुलाचे काम सुरू असल्याने त्या टप्प्यात वाहतूक कोंडी होताना दिसते. यासाठी अनेकजण जुन्या रस्त्यातून जात असल्याने येथे आणखी वाहतूक वाढल्याने वाहतुकीवर ताण वाढला आहे.