Japanese Tourist Fraud Case: जपानी पर्यटक तात्सुकी याची गोव्यातील हणजुण समुद्रकिनारा परिसरात एका टोळक्याने लुबाडणूक केली होती. तात्सुकी यांना रोकड, फोन व इतर साहित्य असे एकूण सुमारे साडे नऊ लाखांना लुबाडले गेले होते. तात्सुकी यांनी ट्विटरवरून याबाबत कैफियत मांडली होती.

त्यानंतर पोलिसांनी गुन्हा दाखल करून तिघांना अटक केली होती. पोलिसांनी तत्परतेने या प्रकरणातील संशयितांना अटक केल्याने पर्यटन मंत्री रोहन खंवटे यांनी या प्रकरणाचा तपास करणाऱ्या पोलिस पथकाला 50 हजार रूपयांचे बक्षीस जाहीर केले.

बुधवारी पर्यटन मंत्री रोहन खंवटे यांनी म्हापसा उपविभागीय पोलीस कार्यालयाचे प्रभारी उपअधीक्षक राजेश कुमार यांची भेट घेतली. या भेटीत त्यांनी जपानी पर्यटकाबाबत घडलेल्या सर्व प्रकाराची सविस्तर माहिती घेतली. त्यातील तपासाची माहिती घेतली. या भेटीत खंवटे यांनी पोलिसांच्या या कामगिरीबद्दल प्रशंसा करीत त्यांची पाठ थोपटली.

रोहन खंवटे म्हणाले की, गोवा हे पर्यटन स्थळ आहे आणि येथे पर्यटकांना सुरक्षित वाटले पाहिजे. पर्यटकांना सुरक्षित वातावरण देणे हे आमचे काम आहे. जपानी पर्यटकाच्या फसवणूक प्रकरणात पोलिसांनीही तातडीने दखल घेत कार्यवाही केली आहे. त्यासाठीच मी आज म्हापशात येऊन पोलिसांचे अभिनंदन केले.

पर्यटकांना सुरक्षिततेची खात्री वाटली पाहिजे. पर्यटक गोव्यात आले पाहिजेत. पोलिसांनी चांगले काम केले आहे. गोवा पर्यटकांसाठी सुरक्षित आहे, हा मेसेज यातून जातो. त्यांना प्रोत्साहन म्हणून पन्नास हजार रूपयांचे बक्षिस जाहीर केले आहे.