Goa Sea Food Festival: गोवा पर्यटन खात्याच्या वतीने बहुप्रतीक्षित गोवा सीफूड फेस्टिव्हलची घोषणा करण्यात आली आहे. येत्या 9 ते 11 फेब्रुवारी या काळात पणजीतील मिरामार बीचवर खाद्यप्रेमींसाठी पर्वणी असणारा सीफूड फेस्टिव्हल आयोजित केला जाणार आहे. सायंकाळी सहानंतर रोज महोत्सवाला सुरुवात होईल.

गोव्याच्या पारंपारिक करीपासून ते सीफूड फ्यूजनपर्यंत सीफूड प्रेमी, स्थानिक आणि पर्यटकांना महोत्सवात आनंद घेता येणार आहे.

सीफूड फेस्टिव्हलमध्ये लोर्ना, श्री सातेरी - कला संघ बेथोडा - फोंडा, गोआट्रोनिक - एडविन, द एसेस आणि पारंपारिक संगीत, नृत्य आणि मनोरंजनाचे लाइव्ह परफॉर्मन्स पाहायला मिळतील. यासह चविष्ट सीफूड, विविध पेये आणि नॉन-स्टॉप मनोरंजन यांचा अनुभव घेता येईल.

सी फूड फेस्टिव्हल कचरा विलगीकरणासाठी प्रगत आणि शास्त्रोक्त पद्धतीचा वापर केला जाणार असून, महोत्सवात प्लास्टिक आणि काचेच्या बाटल्यांचा वापर केला जाणार नाही.

गोवा सीफूड फेस्टिव्हलसाठी पार्किंगची समस्या निर्माण होऊ नये म्हणून विशेष काळजी घेण्यात आली असून, कांपाल एसएजी मैदानापासून मिरामार सर्कलपर्यंत दर 10 मिनिटांनी हॉप ऑन हॉप ऑफ सेवा सुरु राहणार आहे.

चव, संस्कृतीचा अविस्मरणीय अनुभव घेण्यासाठी गोवा सीफूड फेस्टिव्हलमध्ये सहभागी व्हा, असे आवाहन गोवा पर्यटन खात्याने केले आहे.