Tomato Rate : शेतकऱ्यांकडून बेळगाव बाजारात घाऊक पद्धतीने ७० ते ८० रुपयांनी खरेदी होणारा टोमॅटो गोव्यात ग्राहकांच्या हाती पडेपर्यंत त्याचा दर १२० रुपयांवर गेला आहे. त्यामुळे ४० रुपयांचा मलिदा घाऊक व्यापारी, किरकोळ विक्रेत्यांच्या खिशात जात असल्याचे स्पष्टपणे दिसत आहे. दलालांची मनमानी सुरू आहे.

टोमॅटो खरेदी करून किरकोळ विक्रेते १२० रुपये किलो दराने विकत आहेत. याचा सर्वाधिक मोठा फटका ग्राहकाला बसत आहे. देशभरात टोमॅटोचे दर वाढल्याने त्याचा गैरफायदा किरकोळ विक्रेते उठवत आहेत. त्याला लगाम घालण्याची व्यवस्था राज्यात नाही.

राज्याच्या फलोत्पादन महामंडळाकडे भाजीपाला विक्री होतो, पण त्यांच्या केंद्रावर मिळणाऱ्या टोमॅटोचा दर्जा जेमतेम असतो. शंभर रुपयांखाली त्याचे दर असले तरी ग्राहक ‘आलीया भोगाशी असावे साधन'' असे म्हणतच खरेदी करीत आहेत.

पावसाने ओढ दिल्याचा काहीसा परिणाम भाजीपाल्यांच्या उत्पादनावर झाला आहे. बाजारात आवक कमी झाल्याने भाजीपाल्यांचे दर वाढल्याची बाब खरी असली तरी विक्रेते आणि व्यापारी शेतकऱ्यांसह ग्राहकांना लुटत आहेत हे दरावरून स्पष्ट दिसते.

कमी उत्पादनामुळे टंचाई

बेळगाव बाजारातून येणारा टोमॅटो घाऊक दराने तेथील व्यापारी ७० ते ८० रुपयांच्या दराने खरेदी करतात. गोव्यात किरकोळ विक्रेत्यांना येथील व्यापारी २७ किलोचा क्रेट २६०० रुपयांना विकतो. म्हणजे साधारण ९८ रुपये किलोचा दर पडत असला तरी येथील विक्रेते एकाच भावाने म्हणजे १२० रुपये किलोने विकतात. महाराष्ट्र व कर्नाटकातील काही टोमॅटो उत्पादक शेतकऱ्यांना सध्याच्या दरवाढीचा फायदा झालेला आहे.