Sao Joao Festival बाणावली भागातून जाणारा वेस्‍टर्न बायपास हा बगल रस्‍ता मातीचा भराव टाकून न उभारता तो स्‍टील्‍टवर उभारण्‍यात यावा, अशी मागणी करणाऱ्या बाणावलीच्‍या लोकांनी शनिवारी (ता.24) सांजावचे निमित्त साधून पेडा-बाणावली येथे प्रतिकात्‍मक निषेध व्‍यक्‍त केला.

यावेळी या भागातील लोकांनी एक बोट तयार करून आणली होती. जर हा रस्‍ता मातीचा भराव घालून बांधून काढल्‍यास या भागात पावसात पूर हा अटळ आहे.

आणि तशी परिस्‍थिती उद्‍भवल्‍यास लोकांना या बाेटीचा स्‍वत:चा जीव वाचविण्‍यासाठी वापर करावा लागेल, असे यावेळी सांगण्‍यात आले.

युनायटेड बॉयज ऑफ बाणावली या संघटनेच्‍यावतीने हा अनाेखा निषेध कार्यक्रम आयोजित केला होता. यात लहान मुलांनीही भाग घेतला होता.

यावेळी जी बोट तयार करून आणली होती त्‍याच्‍या शिडावर मुख्‍यमंत्री डॉ. प्रमोद सावंत यांना उद्देशून एक संदेश देण्‍यात आला होता. ‘बाणावलीला वाचवायचे असेल तर हा रस्ता स्‍टील्‍टवर बांधा’ असे त्‍यावर लिहिले होते.

हा रस्‍ता स्‍टील्‍टवर बांधला नाही तर पावसात आमच्‍यावर बुडून मरण्‍याची वेळ येऊ शकते. मात्र, आमचे मुख्‍यमंत्री ही वेळ आमच्‍यावर येऊ देणार नाहीत, याची आम्‍हाला खात्री आहे.

हा रस्‍ता स्‍टील्‍टवर बांधण्‍यासाठी मुख्‍यमंत्र्यांनी प्रयत्‍न करावेत, अशी आमची मागणी आहे.

- पेले फर्नांडिस, मच्‍छीमार नेते