Domestic Dispute Leads to Fight Among Sisters on Colva Beach

मडगाव : घरगुती वादातून एका बहिणीने दुसऱ्या बहिणीच्या झिंज्या उपटण्यास सुरुवात केली. या भांडणात तिसऱ्या बहिणीनेही भाग घेतल्याने आज दुपारी कोलवा समुद्र किनाऱ्यावर लोकांच्या गर्दीत चक्क ‘फ्री स्टाईल’ मारामारी सुरू झाली. ही मारामारी सोडविण्यास गेलेल्या लोकांनाही शिवीगाळीला सामोरे जावे लागले.

एवढेच नव्हे, तर कोलवा किनारी तिघा या बहिणींना ताब्यात घेण्यासाठी आलेल्या पिंक फोर्सच्या महिला पोलिसांनाही या भगिनींनी धक्काबुक्की केली. या तीन बहिणींची नावे मधू पाटील, जान्हवी साबळे आणि निलम पाटील अशी असून सार्वजनिक ठिकाणी शांतता भंग केल्याच्या आरोपाखाली पोलिसांनी त्यांना अटक केली आहे. कोलवा पोलिसांनी दिलेल्या माहितीनुसार, या तिन्ही बहिणी मूळच्या बेळगाव येथील असून सध्या त्या कामानिमित्त रावणफोंड येथे भाड्याच्या घरात राहतात.

आज त्या कोलवा समुद्र किनाऱ्यावर भटकंतीसाठी आल्या असता त्यांच्यात वाद सुरू झाला. शब्दाला शब्द वाढत हे भांडण भडकल्याने त्यांनी एकमेकींच्या झिंज्या उपटण्यास सुरुवात केली. हे भांडण हाताबाहेर जाते, हे पाहिल्यावर काही लोकांनी मध्ये पडून ते थांबवण्याचा प्रयत्न केला असता त्यांनी लोकांनाही शिवीगाळ केल्याने लोकांनी पोलिसांना बोलावले.

या महिला इतक्या आक्रमक झाल्या होत्या की, त्यांना ताब्यात घेण्यासाठी पिंक फोर्सच्या महिला पोलिस तिथे आल्या असता, त्यांनाही धक्काबुक्की केली. शेवटी त्यांना पोलिसांनी ताब्यात घेऊन अटक केली. सध्या त्या तिघी पोलिस कोठडीची हवा खात आहेत.