पेडणे: मोरजीत परप्रांतीय नागरिकांमध्ये वादातून हाणामारी झाल्याची घटना उघडकीस आली आहे. यात दिल्लीच्या एका व्यक्तीला गंभीर मारहाण करणाऱ्या उत्तराखंड आणि उत्तर प्रदेशच्या तिघांना अटक करण्यात आली आहे. बुधवारी दुपारी दीड वाजता ही घटना घडली.

भरत सिंग सौद (३८), योगेश सिंग (२४) (दोघेही रा. उत्तराखंड) आणि सचिन पांडे (२७, रा. उत्तर प्रदेश) असे ताब्यात घेण्यात आलेल्या संशयित तिघांची नावे आहेत.

याप्रकरणी चेतन यादव (रा. पितमपुरा, दिल्ली) यांनी पेडणे पोलिसांत तक्रार दाखल केली आहे.

पोलिसांनी दिलेल्या माहितीनुसार, तिघा संशयितांनी दिल्लीच्या चेतन यादव याच्यावर हल्ला करुन मारहाण केली. तिघांनी यादव यांना लाथाबुक्क्यांनी तसेच जड वस्तूंच्या मदतीने मारहाण करुन जखमी केले.

संशयितांनी त्याच्याकडून सोन्याची चैन आणि चांदीचे ब्रेसलेट देखील चोरी केल्याचे तक्रारीत म्हटले आहे. पोलिसांनी तिन्ही संशयितांना ताब्यात घेतले असून, पोलिस अधिक तपास करत आहेत.