बेळगाव: कळसा-भांडुरा योजनेचे काम सुरू केले नसल्याचा दावा कर्नाटक शासनाकडून केला जात असला तरी या प्रकल्पाजवळील चिक्कहट्टीहोळी येथे समाज भवन तसेच रयत भवन आणि कणकुंबी येथे विश्रामधाम बांधण्याचे काम हाती घेतले जाणार आहे.

या तिन्ही बांधकामांसाठी सर्वेक्षण, अंदाजपत्रक, नकाशे व आराखडा तयार करण्याच्या कामाचा ठेका कर्नाटक (Karnataka) पाटबंधारे विभागाच्या खानापूर येथील कळसा प्रकल्प विभागातर्फे दिला जाणार आहे. या कामाचा ठेका देण्यासाठी पाटबंधारे विभागाकडून निविदा काढली आहे. २२ ऑक्टोबरपर्यंत निविदा मागविल्या आहेत. खानापूर येथील कळसा प्रकल्प विभागाने ९ ऑक्टोबर रोजी ही निविदा प्रसिद्ध केली आहे.

गोवा सरकार आपल्या भूमिकेवर ठाम

गोवा सरकारने कळसा-भांडुरा प्रकल्पावरील आक्षेप मागे घेतल्यास तम्नार-गोवा या उच्चदाबाच्या वीजवाहिनी प्रकल्पासाठी कर्नाटककडून ना-हरकत दिली जाईल, असा प्रस्तावही मुख्यमंत्री सिद्धरामय्या यांनी मांडला आहे. पण कळसा-भांडुरा प्रकल्पाच्या विरोधातील भूमिका गोवा राज्याने कायम ठेवली आहे.