Panjim Theft News: पणजीत पार्क करून ठेवलेल्या वाहनामधील किमती साहित्य तसेच 2 लाख रुपये रोकड मिळून सुमारे 9 लाखांचा ऐवज चोरांनी लंपास केला. ही घटना 7 तारखेला रात्री 10.30 ते पहाटे 4.20 च्या दरम्यान घडली.

याप्रकरणी हैदराबादेतील श्रीधर रेड्डी यांनी तक्रार दाखल केली असून पोलिसांनी अज्ञाताविरुद्ध गुन्हा दाखल केला आहे. पोलिसांनी दिलेल्या माहितीनुसार, तक्रारदार रेड्डी यांनी भाडेपट्टीवर रेंट ए कार घेतली होती. या कारमध्ये त्यांचे साहित्य ठेवलेल्या ४ बॅगा होत्या. गाडीमध्ये साहित्य ठेवून ते जवळच खरेदीसाठी गेले होते.

ते कारकडे परतले असता, वाहनाच्या डाव्या बाजूकडील काच फोडून दारे उघडलेली आढळली. तसेच आतील बॅगा लंपास केल्या होत्या.

या बॅगांमध्ये 5 लाख रुपये किमतीचे दोन मॅकबुक लॅपटॉप, 70 हजारांचे सन ग्लासेस, 50 हजारांचा डेसन हेअर ड्रायर, 50 हजारांचे चप्पल्स, एक पासपोर्ट तसेच पाकिटामध्ये विविध बँकांची एटीएम कार्डस् तसेच रोख रक्कम होती.

याप्रकरणी पणजी पोलिसांनी जवळच्या सीसीटीव्ही फुटेजच्या मदतीने तपास सुरू केला आहे. चोरांनी तक्रारदार आणि त्यांचे मित्र कोठे जातात हे त्यांच्या मागावर राहून पाहिले असावे आणि रात्री उशिरापर्यंत ते परतणार नाहीत, याची खात्री करूनच ही चोरी केली आहे.