पणजी: करंझाळे येथील एका राष्ट्रीयीकृत बँकेचे एटीएममधील पैसे लुटण्याचा प्रयत्न काल रात्री काही चोरट्यांनी केला. रात्रीच्यावेळी गस्तीवर असलेल्या पोलिसांना पाहून तेथून चोरट्यांनी पळ काढल्याने तो फसला.

याप्रकरणी पोलिसांत गुन्हा दाखल झाला नसला तरी पोलिसांनी याप्रकरणी चौकशी सुरू करून संशयितांचा शोध सुरू केला आहे. पोलिसांच्या गस्तीमुळे चोरीची घटना टळली. त्यामुळे पोलिस गस्त अधिक तीव्र करण्यात आली आहे.

यासंदर्भात चौकशी करताना पोलिसांना मिरामार येथे गुजरात नोंदणी असलेली गाडी पदपथावर उभी करण्यात आली होती. त्या गाडीला व्हील क्लॅम्प लावण्यात आले होते, मात्र चौकशीअंती या गाडीचा या चोरीशी काहीच संबंध नसल्याचे पोलिसांनी सांगितले.

एटीएममध्ये असलेल्या सीसी टीव्ही कॅमेरामध्ये एक युवक आतमध्ये घुटमळत असल्याचे दिसले. त्या ठिकाणी गाडी थांबून पोलिस तेथे पोचेपर्यंत तेथील काळोखाचा फायदा घेऊन त्या युवकाने तेथून पळ काढला. हा युवक मनोरुग्ण असण्याची शक्यता पोलिसांनी वर्तविली आहे.

एटीएममध्ये इतक्या रात्री तो काय करत होता याची माहिती तेथील सीसीटीव्ही कॅमेराच्या मदतीने पोलिस करत आहेत.