Split In The Goa Maharashtrawadi Gomantak Party: पेडण्याच्या विभागीय नियोजन आराखड्याच्या मुद्यावरून तूर्त तरी मगो पक्षात फूट पडल्यातच जमा आहे. मांद्रेचे आमदार जीत आरोलकर यांनी या आराखड्याविरोधात दंड थोपटले आहेत, तर पक्षाच्या धुरिणांनी सरकारच्या भूमिकेचे समर्थन करण्याचा निर्णय घेतला आहे.

आता याप्रकरणी सुवर्णमध्य काढण्यासाठी येत्या शनिवारी बैठक बोलावण्याचा विचार मगोपने चालवला आहे. विशेष म्हणजे, जीत यांच्या म्हणण्याला हवा देण्याचे काम सत्ताधारी भाजपमधूनच केले जात असावे, असा संशय मगो नेतृत्वाला आहे.

आरोलकर यांनी मांद्रेतील सरपंच, पंचांसह थेट मुख्यमंत्री डॉ. प्रमोद सावंत यांची भेट घेऊन जनतेचे त्या विषयावरील गाऱ्हाणे मांडले.

त्यानंतर नगरनियोजनमंत्री विश्वजीत राणे यांनी मांद्रेचे माजी आमदार दयानंद सोपटे आणि पेडण्याचे आमदार प्रवीण आर्लेकर यांच्याशी बैठक घेत आराखड्याला पेडणेवासीयांचे समर्थन असल्याचे चित्र तयार केले.

या मुद्यावर तूर्त जीत हे एकाकी पडल्याचे दिसून येत आहे. राणे यांनी तर त्या आमदाराचे फार्म हाऊस पाडून टाकण्याची कारवाई सुरू करण्याचे आदेश खात्याला दिल्याचे जाहीरपणे सांगितले आहे. जीत यांनीही कारवाई करावीच, असे प्रतिआव्हान दिले आहे.

त्यांनी भू-रूपांतरासाठी आपण मंत्र्यांकडे गेलो नाही तर त्यांनी दूरध्वनीवर संपर्क साधून बोलावून घेतले होते, असा पलटवार केला आहे.

सुरवातीला तालुक्यातील पंच व सरपंच जीत यांच्यामागे असल्याचे चित्र निर्माण झाले होते. मात्र, दुपारनंतर सारेजण राणे यांच्या बाजूने उभे राहिल्याचे दिसले. त्यामुळे जीत यांना घेरण्यासाठीचे प्रयत्न सुरू झाल्याचे मगोपचे मत बनले आहे.

अद्यापही पक्ष नेतृत्वाला विश्वासात न घेता सत्ताधारी आघाडीत असताना वेगळीच भूमिका घेतल्याप्रकरणी आमदारावर कारवाईचा विचार मगोपचे नेतृत्वाने अद्याप केलेला नाही.

मात्र, येत्या शनिवारी (ता.१४) जीत यांना पक्षाच्या केंद्रीय समितीसमोर बोलावून त्यांची भूमिका जाणून घेण्याचा प्रयत्न केला जाणार आहे.

मुख्यमंत्री डॉ. प्रमोद सावंत आणि नगरनियोजनमंत्री विश्वजीत राणे यांच्यातील सुप्त संघर्षात सत्ताधारी गोटातूनही राणे विरोधकांकडून जीत यांना बळ दिले जात असावे, असा मगोपला संशय आहे.

त्यामुळे जीत यांच्यावर कारवाई किंवा त्यांना तत्काळ जाब विचारण्याचे मगोप टाळत आहे. मात्र, या विषयावरून मगोपमध्ये सध्या फूट पडल्याचे दिसून येत आहे.

आरोलकरांचे म्हणणे जाणून घेणार

"जीत आरोलकर यांनी सरकारविरोधी भूमिका कशी घेतली, हे माहीत नाही. त्यांचा ‘बोलविता धनी’ कोणीतरी वेगळाच असावा, असे दिसते. येत्या आठवडाभरात बैठक घेऊन त्यांचे म्हणणे आम्ही जाणून घेणार आहोत."

- दीपक ढवळीकर, अध्यक्ष, मगोप.

"पेडणेतील भू-रूपांतर आराखड्याप्रश्‍नी लोकच माझ्याकडे आले होते. त्यांनी आराखड्यामुळे कसा अन्याय होतोय, हे दाखवून दिले. त्यामुळे जनतेसोबत राहण्याचा मी निर्णय घेतला आहे. मात्र, याबाबत मगोपच्या नेतृत्वाशी बोललो नाही, हे खरे आहे."

- जीत आरोलकर, आमदार, मांद्रे.